Jowai, Nailur 27
Ka jingïa pyni bor hapdeng ki ar jaidbynriew kata ki Karbi bad ki Pnar da ka jingïasiat jri markylliang bad ki Karbi kiba pyndonkam da u khnam bad ryntieh ha ka thaiñ Lapangap-Tahpat ka la bteng biang ha ka Sngi Balang. Kum shi bynta ban tem ïa kane ka jingjia ki pulit Assam ki la pyndonkam da ki bom pynsat khmat ban pynpra ïa ki paidbhur Pnar na ka shnong Lapangap kumjuh ïa ki majistor bad ki pulit ka jylla.
Ka jingïakawang maw da kaba pyndonkam da ki jri siat sim ka long na baroh arliang mamla, hynrei ki Karbi ki la bteng ban siat da ki khnam ïa ki Pnar da ka jingthmu ban pynmynsaw jur ïa ki.
Kane ka jingïasiat jri markylliang ka la sdang ha ka por kumba 12:26 baje nohphai sngi ha kaba la sakhi ruh ïa kiba bun ki nongshong shnong ka Lapangap ki la mynsaw bad lai ngut napdeng jong ki, ki la mynsaw jur kiba kynthup ïa u Bah Nibait Sariang, Bah Ros Shadap bad u Sangaid Joit.
Ha kane ka jingïakynad, ki Karbi ki la thang ruh ïa ar tylli ki ïing trep kaba don ha pynthor kaba dei trai da u Bah Thomas Hadem bad ki la jynrat ruh ïa ki jingthung kum u kba, sying bad kiwei kiwei ki mar rep.
Hapdeng kane ka jingïaleh kaba markylliang la sakhi ruh ïa ki pulit na baroh arliang jylla kim shym la lah ban tehlakam bad hap ban shu long tang ki nongpeitkai, katba uwei pat u pulit jong ka Assam u la thew siat da ka suloi ïa ki Pnar kiba dang ïa pyni bor pyrshah ïa ki Karbi.
La sakhi ruh ba ki longkmie ki la mih shakhmat ban ïada ïa ka khyndew ka shyiap ryngkat ki jri siat sim ban ïakhun pyrshah ïa ki Karbi katba ki longkmie pat ki bunkam ha kaba kyllaiñ maw myllon ban ïakhun pyrshah ïa ki Karbi.
Hadien ba ki pulit jong ka Assam ki la siat san tylli ki bom pynsat khmat, ki paid Pnar ki la ïapra noh na katei ka jaka bad ki Karbi ruh ki la pra noh.
Haba ïakren bad u Waheh Shnong u Bah Deimonmi Lyngdoh u la ong, kane ka jingjia ka sdang hadien ka jingjia ha Khanduli, ha kaba ki Karbi ki la wan sha u pud u sam ka shnong Lapangap da kaba pynjot pynpra ïa ki tynrai dieng ba la thung ka shnong Lapangap ha ki lum Pynthor.
U la ïathuh ba ha ka 24 tarik Nailar na ka liang ka Dorbar Shnong da ka jingbym banse ka la mih paidbah ban thung dieng tynrai ha jaka jong ki dieng tynrai bala shah pynjulor ha ki Karbi ha u Lum Moo Pyrdet Pynthor, Lapangap.
U la ong ba naduh katei ka 24 tarik ka kynrum kynram ka la sdang bad mynta la dap shi bnai ba ki Karbi ki ïa ap miet bad sngi sha shiliang pynthor bad kane ka wanrah ka jingwit jingthut ïa ki nongrep ka shnong Lapangap.
U la ong haba ki nongrep ka shnong Lapangap ki leit sha pynthor ban pyllait um sha ki hali bad ban peit ïa u kba, ki Karbi ki pyntieng pynsmiej ïa ki da kaba pyndonkam ban siat da ka jri, u khnam ka ryntieh bad thang ruh ïa ki ïing trep.
U la ïathuh ba ha shnong Nongjrong kaba don shilliang ka Tahpat ki nongshong shnong jong ka Lapangap kiba don ïa ki lyngkha hali kim ïoh shuh ban leit peit ïa u kba bad kiwei ki mar rep bad ki ïing trep jong ki ruh bun kiba la shah thang kumjuh ki mar rep ki la shah pynjulor lut.
Ki nongshong shnong ha kane ka jingïakynad kaba la neh shibnai ki la wad ki lad ki lynti ban wanrah ïa ka jingshong suk shongsaiñ ha kane ka thaiñ hynrei ki Karbi ki la bteng beit ka jingpyndik bad ki nongshong da ka jingbym banse ki hap ban ïada ïa ka khyndew ka shyiap kaba dei ka hok bad ka nongkynti kaba ki la ïoh pateng naduh ki lai spah snem mynshwa, la ong u Bah Lyngdoh.
U la ong mynshwa ka Tahpat ka don hapoh u pud u sam jong ka dorbar shnong Lapangap ba hap hapoh ka Elaka Shilliangmyntang hynrei na ka daw ba don ka jingbym sngewthuh jingmut ne sngewpher jaidbynriew, kumta ka Dorbar Shnong Lapangap ka la ai sngewbha ïa ki Karbi ba kin shong ha ki lum Tahpat.
U Waheh Shnong u la kyrpad ïa ka sorkar ba kan shimkhia ïa kane ka jingïakynad khnang ba ki nongshong shnong ka Lapangap kin ïoh ban ot suk ot saiñ ïa u khaw u kba uba don ha Pynthor Lapangap.
