Shillong, Nailur 27
Uwei u pulit langrut kyndit-kynsan u la dkhat jubor noh ïa la ka jingim da kaba siat ïalade da ka suloi kaba u bat na ryndang.
Kane ka jingjia ka la jia ha ka step jong ka Sngi Balang ha ka por ba utei pulit langrut u dang don ha ka kam ban pahara ïa ka ïing sah jong u Additional Judge ka ïingbishar Meghalaya High Court kaba don ha Kenches Trace, Laban.
Katkum ka khubor na ki pulit, la ïathuh ba une u pulit langrut u dei ba la tip kyrteng kum u Chiran Moshahary, bad u la shim ïa kane ka sien jam kaba la pynkyndit ïa baroh hadien ba u la pyndonkam ban siat ïalade da la ka jong ka suloi kaba u la bat ban pahara.
Haba pyntip halor kane ka jingjia, u Superintendent of Police (SP) ka East Khasi Hills u Bah Sylvester Nongtnger u la ong ba ki pulit ki la ïoh jingtip halor ka jingthiah lyngktar jong u pulit ha madan ha ka por kumba 6.30 mynstep, ha kaba ki pulit ki la leit mar mar sha katei ka jaka ban lap ba une u pulit langrut u la dep ban siat ïalade.
“Ki pulit ki la lap ba ka suloi kaba la ai sha u, ka la don ha ka kti ka jong u, te la suba jur ba u la siat ïap ïalade,” la ong u SP.
Haba kylli, u SP u la ïathuh ba une u pulit u la don bad pahara marwei baroh shi miet, bad kumta kaei kaba la jia bad u, haduh mynta ym pat lah ban tip satia.
U Chiran Moshahary u dei uba sah ha Police Quarter ha Police Reserve, Jail Road, Shillong. Haduh ba thoh ïa kane ka khubor ym pat shym la lah ban tip ïa ka daw kaba la pynlong ïa une u pulit ban dkhat ïa la ka jong ka jingim, hynrei na ka liang jong ki pulit ki la pynlong ïa ka jingtohkit ban lap ïa kaei ka daw ba lam shaduh une u pud.
Ïa ka metiap jong une u pulit langrut la shimti noh da ki pulit ka thanat Laban bad hadien kata la pynkit sha Civil Hospital na ka bynta ban leh ïa ka Post Mortem.
