Nongstoiñ, Nailur 27
Ka Hynñiewtrep Youths’ Council (HYC) West Khasi Hills District ha ka Sngi Balang ka la ïoh ka jingujor na ki katto-katne ba ki don ar ngut ki bar jylla na Hyderabad kiba la ïoh NOC na ar tylli ki shnong; Theipkseh bad Mawlangriang, ha kaba ki la ïoh ïa ka sanad (appointment) ban trei bad mynta ki ap sa tang ïa ka jingai jingmynjur na Postmaster Nongstoiñ, kumta kin sa ïoh trei hapoh ka thaiñ.
U General Secretary ka HYC u samla Wanreibok Lyngdoh u la ong ba ka seng ka pynpaw ka jingsngewsih ban ïohsngew ïa kum kine, ïa kaba ka seng ka la maham ba kim dei ban ai NOC ïa kum kine kiba wan pan na shnong ha kaba ka HYC ka la ai ruh da ka jingthoh ban kyrpad hynrei mynta dang mih biang kum kine kiei ïa kaba ka seng kam lah ban pdiang. Shuh shuh u la ong ruh ba ka HYC ka pynrem jur ïa ki Rangbah Shnong jong kitei ki shnong kiba la ai NOC ïa kine ki bar jylla khlem da pyrkhat shuh ïa ki pateng jong ki khun ki kti.
U la ïathuh ruh ba halor katei ka bynta, ka HYC ka la ai ruh da ka jingthoh sha ka Postmaster jong ka Nongstoiñ ba kam dei ban ai jingmynjur eiei ïa kine ki bar jylla mynta kat haduh ba ka sorkar jylla kan da pynbeit ïa kane ba kumno kine ki bar jylla ki ïoh ban wan hapoh ka jylla.
“Ka HYC ka kyntu ïa ki Rangbah Shnong ba kim dei ban ai NOC ïa kino kino kiba nabar kiba wan pan NOC ban ïoh trei ha Post namar kan ktah ïa ka jaidbynriew jong ngi,” la ong u samla Wanreibok.
Na ka liang u samla Wanreibok u la ong ba ka HYC ka maham ruh ïa kino kino kiba thmu ban ïarap ban pynmih NOC ïa kine ki bar jylla lada ka lap kan lehda kaba tyngeh bad ha kajuh ka por ka seng ka dawa na ka sorkar jylla ba ka dei ban pynbeit noh halor kane ka Post Gramin Dak Sevak (GDS) kumba long ha kiwei ki jylla ba ki ailad beit tang ïa ki trai jylla ban ïoh ïa kane ka Post.
