Shillong, Nailur 27
Ka jingpyntreikam ïa ka ‘eGramSwaraj’ ka la sdang ha Khasi Hills Autonomous District Council (KHADC) haba ïadei bad ki projek kam pynroi kiba wan kum ka ‘tied bad untied grant’ lyngba ka Sorkar Pdeng hapoh ka 15th Finance Commission, bad tang ka KHADC ka dang dei ban ïoh sa T.200 klur na ka Sorkar Pdeng.
Ki briew na ka tnat Panchayati Raj ka Sorkar Pdeng ki la wan khnang ban ai jinghikai ïa ki ophisar bad karikor (engineer) ka KHADC kumno ban pyndonkam ïa ka eGramSwaraj portal ha kaba baroh ki jingdonkam kiba ïadei bad ki projek hap ban ïaid lyngba kane ka portal.
Kane ka jinghikai ka la sdang ha ka Sngi Balang ha KHADC ha kaba la sdang da ka jingïakynduh kaba la pynïaid da u Executive Member (EM), Bah Teiborlang Pathaw ha ka jingïadonlang ka Joint Secretary ka tnat DCA ka Sorkar Jylla, Kong Aldea Nikhla.
Haba kren sha ki lad pathai khubor, u CEM ka KHADC u Bah Pynïaid Sing Syiem u la ong ba kane ka portal ka dei kaba hap pyntreikam beit da baroh ki ADC, bad ha Meghalaya la sdang na KHADC bad kiwei ki ADC ruh kin sa ïoh jinghikai lang kumjuh.
Haba batai shaphang ka jingmang pisa ka Sorkar Pdeng katkum ka bhah kaba la kdew hapoh ka 15th Finance Commission, u Bah Pynïaid u la ong ba ka KHADC ka la ïoh ïa ka bhah na ka Sorkar Pdeng katkum ka 15th Finance Commission tang haduh u snem 2020-2021.
U la ong ba haduh u snem 2021-2022, ka KHADC ka la ïoh ïa ka bhah kaba dei tang na bynta ka tied grant, katba ka bhah kaba dei na bynta ka untied grant, ym pat shym la pyllait.
U Bah Pynïaid u la pyntip ruh ba ha ka jingïakynduh lang ki Autonomous District Council (ADC) ka Jylla bad ki ophisar ka tnat Panchayati Raj bad ka tnat Finance ha New Delhi, la bthah ban pyntreikam ïa ka ‘eGramSwaraj’ bad ki lai tylli ki ADC na Meghalaya kin don la kajong ka kot ka sla bad yn nym buh lang shuh hajuh kumba long baroh shikatta ha kaba ïa ki lai tylli ki ADC na Meghalaya la pynrung hajuh ha ka rukom mang pisa.
U la ong ba tang ka KHADC, ka dei ban ïoh ym duna ïa ka T.200 klur na ka bynta ka tied bad untied grant kaba dei wan lyngba ka bhah katkum ka 15th Finance Commission.
U CEM la ong ba ka jingmang pisa ïa ki lai tylli ki ADC ha Meghalaya la leh ha ka rukom bhah kaba long 9:7:3 kata ka long KHADC: GHADC: JHADC.
U Bah Pynïaid u la ong ba da kaba pynngat noh mar la kajong, ka ADC kaba kham sted ban pyntrei ïa ki projek kan nym ïakhleh lang bad kiwei ki ADC kiba kham suki lane ki bym lah ban pyntrei ïa ki projek kam pynroi kiba la bhah khnang ban leh lyngba ki District Council.
Une u CEM ka KHADC u la ïathuh ruh ba lyngba ka jingpyndonkam ïa ka eGramSwaraj, ka rukom pyntrei ïa ki projek ruh kan kham sted bad kan long kaba ïashai namar naduh ba pynkhreh ïa ki projek hap ban thep lypa noh hapoh ka eGramSwaraj portal.
