Shillong, Nailur 27
Hadien ba la ïohi ba ka jingdawa ban pynrung ïa ka ktien Khasi ha ka khyrnit baphra jong ka riti synshar ka ri ka khlem poi shano shano, ka Khasi Author’s Society (KAS) ka la shim da ka rai ban leit pynsngew dalade sha ki shkor jong ka Sorkar Pdeng ka National Democratic Alliance (NDA) hapoh ka jingïalam ka Bharatiya Janata Party (BJP) ban dawa pynrung noh ïa ka ktien Khasi ha katei katei ka khyrnit.
Haba kren bad ki lad pathai khubor ha ka Sngi Balang, u President ka KAS, u Dr. DRL Nonglait ha ka jingïakren u la ong ba kam don jingmut ban shu pynsngew tang lyngba ki lad pathai khubor hangne bad u la ong ba kam poi shano shano ruh ban shu ïaksaid tang ha Rilum Khasi-Jaiñtia hynrei na ka liang ka KAS ka la rai ban pynlong syndon da ka jingïalang paidbah ha Jantar Mantar, New Delhi ha ka 30 tarik mynta u bnai.
“Naduh ki snem 2017-18 ngi la pynlong ïa ka jingïaid paidbah, ki jingpynshai ha ki distrik ka Bri u Hynñiewtrep bad ha kylleng ki jaka. Ka sorkar jylla ruh ka la shimkhia bad ha u bnai Naiwieng, 2018 ka sorkar ka la rai ban kyntu ïa ka Sorkar India ban pynrung ïa ka ktien Khasi ha ka khyrnit baphra,” la ong utei u President.
“Ka jingpynlong ïa ka jingïalang ha Jantar Mantar ka dei ka jingdawa ba shonghok kumba la kular da ka Riti Synshar ka ri India ha ka Article 29 kaba ong, ‘kano kano ka kynhun bynriew kaba shong hapoh ka ri India kaba don ïa ka ktien, ka kolshor bad ki dak thoh la ka jong kiba kyrpang ki don ïa ka hok ban pynneh bad ban pynsah. Kane ka Article ka ai jingkular ba ngin ïoh ïa ka jingithuh na ka Riti Synshar namarba haduh mynta ngim pat ïoh,” la ong u Dr. Nonglait.
U Dr. DRL Nonglait u la ong ba ha kiwei kiwei ki bynta, ka Sorkar Jylla ha ka jingïatreikam bad ka KAS ka la ai ki jingïarap kat kiba ka KAS ka donkam.
“Mynta kane ka kam ka don ha Delhi, ngim tip haduh katno ka sorkar jylla ka lah ban pynkohnguh, pynsngewthuh, pynngeit ïa ki nongïalam jong ka sorkar ha Delhi ban pynrung ïa ka Ktien Khasi ha ka khyrnit baphra,” la bynrap u Dr. Nonglait.
Shuh shuh u Dr. Nonglait u la ïathuh ruh ba ka KAS kaba la lamkhmat mynta la 40 snem ban dawa ïa ka jingpynrung ïa ka ktien Khasi ha ka khyrnit baphra ka la sngewdei ban pynlong noh da ki prokram jong ka Society ha Delhi ha kaba yn sa pynlong ïa ka National Seminar halor ka phang ‘Ka Ktien, ka Litereshor bad ka Kolshor Khasi.’ Ki nongïashim bynta ha ka National Seminar ka ban long ha ka 29 bad ka 30 tarik mynta u bnai kin long ki riewshemphang na nongbah Shillong bad na kiwei kiwei pat ki nongbah jong ka ri India baroh kawei, kum na Delhi, Pondicherry, Hyderabad, Bangalore bad na kiwei kiwei ki jaka.
U Dr. Nonglait u la ong ruh ba u khmih lynti ba kane ka jingïalang kan long kaba jop bad bynrap ruh ba ka jingpynlong ïa ka National Seminar ka dei ka jingïatreilang hapdeng ka KAS bad ka Hynñiewtrep Delhi Association (HDA) kaba trei na ka bynta ka bha miat jong ki Khasi kiba trei bad pule ha Delhi.
“Ngi kyntu ïa kiba sah ha Delhi, kiba trei bad kiba pule ba kin ïashim bynta lang ha kane ka National Seminar kaba ar sngi bad ngi kyntu ruh ïa ki paid Khasi kiba leit donkam sha Delhi ban ïashim bynta lang,” la ong u Dr. Nonglait.
Ha ka sngi banyngkong jong ka seminar u MP ka Shillong u Bah Vincent H. Pala un sa long kum u Kongsan, katba u Lamphang jong ka Ïingdorbar Thawaiñ ka KHADC u Bah Lamphrang Blah un sa long kum u Symbud Kongsan nalor ka jingïadonlang jong ki dkhot sengbhalang bapher bapher na kane ka jylla. Katba ha ka sngi kaba bud pat, u Myntri ka tnat Arts and Culture u Bah Paul Lyngdoh un long kum u Kongsan, katba u Bah Alexander L. Hek un sa long kum u symbud Kongsan.
