Nongpoh, Nailur 28
U Chief Executive Member (CEM) jong ka Khasi Hills Autonomous District Council (KHADC) Bah Pynïaid Sing Syiem u la byrngem ban ujor sha u Deputy Commissioner (DC) ka Ri-Bhoi bad ban ai da ka ejahar sha ki pulit lada ka jingtih khyndew be-aiñ ka dang bteng ha shnong Pillangkata ha Ri-Bhoi District.
U CEM u la pynpaw ïa kane ha ka Sngi Palei hadien ba u la maham da kaba tyngeh ïa uwei u briew ba la tip kyrteng kum u Billu Taro hapoh ka shnong Pillangkata uba la donkti ban tih khyndew be-aiñ.
Kane ka jingpynpaw na ka liang jong u CEM ka la long hadien ba u la hiar ban jurip hi da lade ïa katei ka jaka tih khyndew be-aiñ ha Pilangkata ban shalan sha Assam.
Hadien ka jingïoh jingtip ba utei u briew u la tih khyndew khlem da ïoh jingbit na ki bor ba dei peit jong ka sorkar jylla khamtam na ka District Council, ki bor Hima, na ka liang u CEM u la hiar jurip dalade ban lap hi ïa kane ka kam be-aiñ.
Haba kren sha ki lad pathai khubor, u CEM u la ong, hadien ka jingïoh jingtip ba ka don ka jingtih khyndew be-aiñ, ka District Council ka la dep ban phah jingthoh ne ka Show Cause Notice ïa u Billu Taro uba dei trai katei ka jaka ban wan ai jingshai bad ban pynshisha ïa ki kot ki sla hapoh ka 15 sngi.
U ïathuh ba kane ka jingaipor ka la kut bad une u briew u khlem wan mih satia ne ai jingpynshai ïa ka show cause notice. Nalor ka jingburom ïa ka Council, u dang bteng hi ïa ka jingtih khyndew tangba la ïoh jingtip ba u tih ha ka por mynmiet.
Kumta ha kaba ïadei bad kane, u CEM u la aipor biang sa ar sngi ïa une u briew ba un wan pynshai bad pynshisha ïa ki kot ki sla ka jinglong trai ïa ka jaka lym kumta ka Council kan ujor noh sha ki bor District ba kin leh ïa kaba donkam.
Ha kane ka jingjurip, ïa u CEM la synran da u majistor ka Ri Bhoi u Bah Eric K Dkhar, nalor ki ophisar ka KHADC, ki nongïalam ka Hima Mylliem, ki nongïalam ka KSU bad HNYF Ri Bhoi District.
