Jowai, Nailur 28
Shi bynta ka jingrakhe ïa ka sngi jong ka thoh ka pule puthi bad ruh ban pynphriang ïa ka khubor jong ka jingnang jingstad halor ka mat kyrpang ‘Promoting Literacy for a world in transition: Building the foundation for sustainable and peaceful societies, ha ka Sngi Palei ha shnong Pdengshakap ka shlem treikam u Block Mission Coordinator, SSA Amlarem ka la pynlong ïa ka Enrolment Drive Programme (EDP) ryngkat ka jingïaid paidbah ki khynnah skul ban pyrta ïa ka khubor jong ka jingkordor ka jingnang jingstad ha kane ka juk mynta.
Ha ka jingïalang ba la pynïaid da u HC Lamin, BMC, SSA Amlarem la ïoh ka jingkren pdiang burom na u A Kassar, Headteacher Pdengshakap Govt. LPS katba ïa ki kyntien maitphang halor ka nongrim jong World Literacy Day la kren da u SD Laloo, DCCM, SSA.
U Bah W Chyrmang ba long u kongsan jong kane ka jingrakhe haba ai jingkren u la khot bad wer ïa ki khynnah ba kin long kiba minot bad trei shitom ha ka jingpule jongki namar ka jingnang jingstad ka long u shabi jong ka jingim bad haba don ka jingnang jingstad ka pynlait ïa u briew na kiba bun ki jingshah teh mraw kiba wan ha ki dur ki rukom bapher.
Na ka liang u BMC, SSA Amlarem ryngkat ka DMC-SSA SEMAM, West Jaintia Hills halor ki kam babha jong ki Volunteer ha man ki Special Training Centre ki la shim ban pynkyrpang ïa kane ka jingrakhe da kaba pynkup burom ïa ki 11 ngut ki Volunteer kiba la trei borbah ban saiñdur ïa kito ki khynnah ba don hapdeng ka jingduh jingkyrmen ha ka ban ïoh ïa ka jingnang thoh nang pule.
Shuh shuh la don ruh ka jingsam ïa ki trophy sha ki khynnah ba jop ha ka Drawing-Painting Competition halor ki jingdro ba ïadei bad ka pule puthi bad ruh ka jingsam ïa ki mememto sha ka Pdengkseh Govt. LPS, Pamtbuh Govt. LPS bad Pdengshakap Govt. LPS kiba long ki nongjop jong ka Slogan Competition.
