Shillong, Nailur 28
Ka Meghalaya Energy Corporation Ltd (MeECL) kaba ju don borabor ha ka jingkyrduh pisa mynta ka hap ban ap sa ïa ka jingkyrshan ka Sorkar Jylla ba kan siew tulop ïa ki nongtrei jong ka, da kaba ai kumba T.40 klur man u bnai kum ka grant.
Kane ka pisa kaba wan na ka Sorkar Jylla sha ka MeECL ka dei na ka bynta ka tulop, ban siew ïa ka baibam kiba la shongthait bad ban pynïaid ïa ki kam jong ka.
U Myntri ka tnat bording u AT Mondal u la ong ba ka Sorkar Jylla ka hap ban kyrshan pisa ïa ka MeECL na ka daw ba ka jingïoh pisa jong ka long kumba T.80 klur ha ka shibnai katba ki jingdonkam kiba dei ban pynlut ki long la kumno kumno arshah kynthup ruh ka jingdonkam ban thied bording.
U la ong ba ka Sorkar ka hap ban thaw lad lang na ka bynta ka MeECL khnang ba ki nongtrei kin nym shah ktah haba ïadei bad ka tulop.
Haba wad jingtip shuh shuh katno ka MeECL ka donkam pisa man u bnai na ka bynta ka tulop bad ka baibam kiba la shongthait (pension), ka tyllong khubor ka ïathuh ba tang ka tulop ka kot kumba T.24 klur katba ka baibam kiba la shongthait ka long kumba T.12 klur.
Kum ban pynkynmaw, ka Sorkar Jylla ka la ju ïeng kum ka nongkyrshan bad nongbahkhlieh ïa ka MeECL kum ha ka por ban ïoh ïa ka ram lyngba ka skhim Atmanirbhar Bharat Abhiyan kaba tyrwa da ka Sorkar Pdeng sha baroh ki kompani kiba ju pynmih bording ilektrik.
