Nongstoiñ, Nailur:
Ka Federation of Khasi Jaiñtia & Garo People (FKJGP) Rambrai Circle ka la ong ba ka jingplie ïa ka Rambrai C&RD Block ka dei tang ka jingpynbieit ïa u paidbah ka Rambrai ha kaba la shu plie ïa ka khlem ka DPR.
U Bah Jistarland Lyngkhoi, President ka FKJGP u la ong ba ïa kane la lap da ka seng ha ka 27 tarik u Nailur 2023 lyngba ka RTI ba ka la pan.
Shuh shuh u la ong ba katkum ka RTI la lap ba ym pat don nongtrei wat tang uwei ruh, bad ïa ka kam dang hap khmih na Nongstoiñ C&RD Block, bad kaba sngew lyngngoh ka long ba la shu phah peit shipor tang ïa ki Data Entry Operators bad Technical Assistants tang na bynta ka MGNREGA & PMAY-G.
U Bah Jistarland u la ong ruh ba ka FKJGP, namarkata ka dawa ïa u Deputy Commissioner ka West Khasi Hill District ba dei ban khot written test noh kloi ïa ka contractual jong ki post ba la pynbna advertisement ha ka 03.07.2023 bad tarik ba khatduh 03.08.2023 bad dei ban leh da kaba shai ym ban thung sop-sop.
Ha kajuh ka por ka dawa na u MLA bad MDC Rambrai-Jyrngam constituency ba kin shimkhia ban bthah ïa ki ophisar ba dei peit ba kin pyndep noh kloi ïa ka DPR jong ka Rambrai C&RD Block khnang ba kan treikam kloi.
