Shillong, Nailur:
Ka tnad ki kam jngoh kai pyrthei ka Sorkar Jylla, ha ryngkat ka jingïasnoh kti lang bad ka ‘Outlook Magazine’, ka la pynlong ïa ka ‘The Indian Responsible Tourism State Summit & Awards 2023 – The Meghalaya Chapter’, ha ka sngi rakhe ïa ki kam jngoh kai pyrthei kaba la long ha ka Sngi Balang ha State Convention Centre, Shillong.
Ha kane ka jingïalang la ïadon lang u Myntri ka tnad kam jngoh kai, Bah Paul Lyngdoh, Commissioner & Secretary ka tnad kam jngoh kai, Dr. Vijay Kumar bad Director ka tnad kam jngoh kai, Bah C.V. D. Diengdoh.
Ka jingthmu jong kane ka jingïalang ka long ban ithuh bad rakhe ïa ki jingtrei shitom bad jingsynñiang jong ki ‘riewshimet bad ki kynhun kiba don bynta ha ka ban kyntiew ïa ki kam jngoh kai kaba don ka jingkitkhlieh bad kaba neh hapoh ka Jylla.
Ha kane ka jingïalang, la sam ruh ïa ki khusnam ha ki kyrdan bapher-bapher, ha kawei ka liang kaba pyninam ïa ka jingtrei shitom jong kito kiba don ka jingsngewkhia ha ka liang ban pynneh-pynsah ïa ki kam jngoh kai.
U Myntri ka tnad kam jngoh kai, Bah Paul Lyngdoh haba ai jingkren u la ai mynsiem ïa ki nongjop kiba ïadon bynta ha ki kam jngoh kai kiba don ka jingkitkhlieh.
U la ong, “Mynta, ka jingwan poi jong ki nongwan jngoh kai sha ka Jylla ka la jan kot 15 lak. Kaba kham sngewtynnad ka long, ki kham bun ki nongwan jngoh kai pyrthei kiba nabar ri kiba wan sha Meghalaya ban ïa kito kiba nabar Jylla. Kane ka long ka jingjop.”
U Commissioner & Secretary ka tnad, Dr. Vijay Kumar, haba ai ïa ka jingkren pdiang sngewbha u la ban jur halor ka jingdonkam jong ka kam jngoh kai kaba don ka jingkitkhlieh ha ka ban pynneh pynsah ïa ka jingitynnad mariang bad ka lariti jong ka Jylla.
U la ong, “Lada leh ha ka rukom ba dei bad ban pynneh-pynsah, ngi lah ban pyndonkam ïa ka tnad kam jngoh kai, ym tang ha ka ban pyninam ïa ka lariti, riti-dustur, ka rukom im jong ngi, hynrei kaba donkam eh ban pyndonkam ïa ka mariang, lariti bad ban thaw ki lad kamai, ki lad ai kam ai jam na bynta ki briew bad ban pynlong ïa ka Jylla kaba riewspah. Ka kam jngoh kai ka lah ban long kata ka kor treikam ka ban kyntiew shisha ïa ka Jylla. Ka thong jong ngi ka long ban pynlong ïa ka Meghalaya kaba bhabriew tam, bad ka Jylla hapoh ka ri ka ban khring bha ïa kiba bun ha ka liang ki kam jngoh kai.”
Ha kane ka sngi, la ïoh ruh ïa ki kyntien ai khublei na u Director ka tnad kam jngoh kai, Bah Cyril V. Darlong Diengdoh, uba la pynpaw ka jingsngewnguh lyngba ki kyntien ai khublei jong u.
