Shillong, Nailur 28
Ka Indian Institute of Technology (IIT) Guwahati ka la dep aiti ïa ka kaiphod khmih bniah haba ïadei ka jinglong jingman ka jingkieng kaba don halor ka jaka ba den ïa ka pung Umïam bad ïa kane ka kaiphod yn dang pule da ka Technical Committee kaba kynthup ïa ki karikor na ka MeECL bad ka Public Works Department (PWD).
U Myntri ka tnat bording u AT Mondal u la ong ba kaiphod kaba ka IIT Guwahati ka la aiti ka dei halor ka jingpyndait thymmai (retrofitting) ïa ka jingkieng ha pung Umïam.
U Mondal u la ong ba shen ka tnat bording ruh kan sa pule bniah ïa kane ka kaiphod jong ka IIT Guwahati bad yn sa shim ïa ka rai haba ïadei bad kane.
Kum ban pynkynmaw, dei ha ka 16 tarik Jymmang mynta u snem ha ka por ba ka um ha pung Umïam ka la hiar bha, ki ‘riewshemphang kiba dei na IIT Guwahati ki la leit jurip ïa ka jingtei kaba den ïa ka pung Umïam bad ïa ka jingshngaiñ ka jingkieng kaba don halor jong kane ka pung kaba ju ïaid da ki spah bad hajar tylli ki kali man la ka sngi.
U Mondal u la leit lang ban khmih hi da lade ïa kane ka pung bad ki jingtei kiba don ha kane ka jaka.
Ha kane ka jingleit jurip, ki ‘riewshemphang ki la lap ba ka jingkieng bad ka jingtei kaba den ïa ka pung Umïam ka long kaba biang bad ym don jingma, hynrei kaba donkam ka long tang ban bujli thymmai noh ïa ki ‘bearing’ kiba pyndait ban ïakyrshut hapdeng ka jingkieng bad ka bynta ba den ïa ka pung Umïam.
U Mondal u la ïathuh ba kaba tikna ban hap leh noh ka dei ka jingbujli ïa ki ‘bearing’ ha kaba la dep ruh ban phah sha ka kompani kaba shna ïa ki bearing ban nang pynpoi noh.
