Jowai, Nailur:
Ka National Monuments Authority (NMA), Ministry of Culture ka Sorkar India ka la khang pyrshah ban shna ne tei ïa kino-kino ki jingtei hajan ki san tylli ki jingtei sahnam jong u mynbarim hapoh West Jaiñtia Hills kiba kynthup ïa ka jingkieng ba la shna tang da ki maw ne (Megalithic) ha Amlarem, ka jingkieng ba la shna da ki maw ïa kaba la tip kum ka Thlumuwi ha Mupyut, ka U-Mawthoh-dur-briew ha Nartiang, ka jingkieng maw ha Syndai bad ka nan rit ha Syndai.
Ka NMA, Ministry of Culture ka Sorkar India ka la pynmih ka jingbthah ban bud ryntih ha kaba ïadei bad ka jingai NOC ne ka jingai jingbit halor ki kam tei ïing tei sem bad kiwei pat ha ki jaka ba la khang pyrshah ne ki jaka ba la ai jingïada kyrpang na ka bynta ki jingtei ba kyrpang lyngba ka Centrally Protected Monuments (CPM).
Ka jingpynmih ïa kane ka hukum ka la wan long ruh hadien ka jingmih jong ki jingtei ki bym shym la ïoh bor ha ki jaka ba la khang pyrshah bad ki jaka kiba hap hapoh ka Centrally Protected Monuments (CPM) bad kaba dei ruh ka jingbud ryntih ïa ki kyndon Ancient Monuments and Archaeological Sites and Remains (AMASR) Act 1958.
Ka AMASR Act ka khang pyrshah ïa kino-kino ki jingtei ne ki jingtreikam ha ki jaka ba la ai jingïada kyrpang kiba don hajan ki jingtei sahnam ba la rim khlem ka jingïoh jingmynjur na ka National Monuments Authority (NMA).
Ka AMASR Act ka khang pyrshah ruh ïa kino-kino ki jingtei hapoh ka 100 meter sawdong jong ki jingtei ba la ïoh jingïada kyrpang bad kaba lah ruh ban long haduh 200 meter ka jingjngai na kine ki jaka ba la khang pyrshah katkum kane ka kyndon.
