Shillong, Nailur 28
Ki ‘riew rangbah ki la leit ujor sha u Bah Pynshngaiñ N Syiem uba dei u Deputy Chief Executive Member (Dy CEM) uba peit ïa ka tnad Elaka ka KHADC ban dawa pynlong ïa ka jingjied Rangbah Shnong ha ka shnong Nongthymmai Lumthangding kaba hap ha Laitlyngkot Sirdarship kaba la ïaid mynta la shisnem shiteng eiei khlem don u Rangbah Shnong.
Haba ïakren bad u Bah T. Dkhar uba dei u nongïalam jong 20 ngut ka kynhun, u la ïathuh ba ha ka dorbar kaba la long ha ka 23 tarik Jymmang, 2022 la wan pynïaid ïa ka jingjied ilekshon Rangbah Shnong da u Sirdar ka Laitlyngkot Elaka Bah Alenson Shabong, hynrei um treh ban ai sanad ïa uba ki paidbah ki la mon lada dang don kiba tyrwa da uwei pat namar u kwah ba ka sur jong ki paidbah kan long beit tang ïa kawei ka kyrteng.
U la ong ba um lah ban jied Rangbah Shnong tang kawei ka kyrteng namar kin don kiba tyrwa, hynrei ki kwah ban shim beit ïa kiba bun paid.
Kumta u la dawa na ka KHADC ban pynlong ilekshon noh khnang ban ïaid beit ki kam ha shnong, hynrei lai tylli ki shithi ba la phah ha ka por u Bah Titos Chyne bad kawei ha ka por u Bah Pynïaid Syiem une u sordar um shym la pynlong ïa ka ilekshon jied Rangbah Shnong.
Nalor kata, u la ïathuh ba naduh bym don Rangbah Shnong shuh, ka kam ïap ka la jynjar hapoh shnong namar kam don shuh ka jingïamih ryntih namar bym don shuh u nongsynshar.
Nangta u la ong ba ka jingai syrnot (certificate) ïa ki nongshong shnong ka la kulmar bha namar la ai hi da u Sirdar ka Laitlyngkot Elaka. Kane kan buh jingeh khamtam lada phah ïa ki kot donkam sha Bank namar ka kwah beit da ka kot ba la soi da u Rangbah Shnong.
Shuh shuh u la ïathuh ba ha kane ka shnong ki don palat 371 ïing bad ki nongshong shnong ki la poi palat 1200 ngut.
Namar kata, u la ong biang ba lada ka KHADC kam sngap ia ka jingkyrpad jong ki paidbah ka long kumba ïuhroit ïa ki paidbah.
Ha kajuh ka por u la ïathuh ba u Bah Pynshngaiñ N Syiem u la kular ban shimkhia ban bthah ïa u Sirdar ba un pynlong noh ïa ka jingjied Rangbah Shnong khnang ban suk ban saiñ ka shnong ka thaw.
