Shillong, Nailur 28
Ka Hynñiewtrep National Youth Front (HNYF) East Khasi Hills District ha ka 28 tarik Nailur, 2023 ka la leit ban khynra laisen kyndit-kynsan ïa ki dukan thoh ‘teem’ kiba don ha Shillong ïa kaba la sdang naduh na Garikhana ter ter shaduh Motphran.
Katei ka jingleit khynra laisen jong ka seng ka long ba hadien shisnem ba ka la leit khynra, ka la lap ba kiba bun ki dukan thoh ‘teem’.
Ha katei ka jingleit khynra kaba pynlyngngoh ïa ka seng ka long ba ïa ka laisen la ai da ka Hynñiewtrep Indigenous Archery Organisers Institute (HIAOI), katba ïa ki nombar pat la leh da ka jong ka Khasi Hills Archery Sports Institute.
Haba kren sha ki lad pathai khubor, kitei ki nongïalam jong ka seng ki la ong ba ha katei ka jingleit khynra ïa ki dukan thoh ‘teem’ la lap ba kiba bun kim don ïa ka laisen.
Kitei ki nongïalam ka seng ki la kyrpad ïa ka sorkar bad ïa ka tnat Khajna ba kan shimkhia ha kaba ïadei bad katei ka mat namar ba na ka liang ka seng kan nym shong kli-kti hynrei kan ïaid beit haduh ban da lah ban pyndep bad ba kane ka mat kan long kaba seisoh bad khnang ba kane ka mat ka ktah ïa ki Khasi namar kiba bun kiba leh bad pynïaid ïa katei ka kam ki dei ki bar jylla katba ki Khasi pat ki la shu long tang ki nongtrei.
Ka seng ka la maham ruh ba kan sa leit dalade sha ka madan siat bad lada ka HIAOI ka dei tang kum ka dur bula ka jaka siat tim kan sa pra.
Shuh shuh kitei ki nongïalam ka seng ki la ong ba kitei ki barjylla ki la pynïaid beaiñ beit ïa katei ka kam khlem kino kino ki kot ki sla kiba biang.
Kitei ki nongïalam ka seng ki la kyrpad ruh ïa ka ïingbishar ka jylla ba kan shimkhia bad pynsted noh ïa kane ka kam khnang ba ka kynhun kaba dei hok ban pynïaid ïa ka jingthoh ‘teem’ kan ïoh.
“Ngi ïohi shai ba ka sorkar ka kyrshan bad ka ailad ïa ki bar jylla bad ka ñion pat ïa ki para Khasi namar ïa u Khasi ka ai ïa ka laisen bad kin hap siew ïa ka khajna, katba ïa ki bar jylla pat kam ai laisen hynrei ka la shu lum da ka pisa”, la ong kitei ki nongïalam.
Kitei ki nongïalam ka seng ki la ong ba lada ka sorkar ka dang ai jingkyrshan ïa kum kitei ki dukan thoh ‘teem’, na ka liang ka seng kan nym ailad ba kitei ki bar jylla kin wan kamai kput hapoh kane ka bri u Hynñiewtrep bad ka seng kan khang beit naphang ïa kito ki dukan thoh ‘teem’ ki bym don laisen.
Ha kaba ïadei bad ki dukan thoh ‘teem’ ki bym don laisen, na ka liang kitei ki nongshong dukan ki la ïathuh ba u don u briew uba ju wan lum pisa T. 3,000 man la u bnai na kitei ki dukan, hynrei um ai pat ïa ka laisen wat la na ka por sha ka por u la kular ba un ai. Kumta ka seng ka la sngewlyngngoh shi kat dei eh halor kane ka jingwan lum pisa jong utei u briew bad ka seng ka la ong ba kan sa buddien bha ban lap ïa ka jingshisha halor kane.
