Shillong, Nailur 28
Ka Meghalaya High Court ha ka Sngi Palei ka la pynpaw ba kam don jingkwah satia ban tip ïa kita ki shithi ba la ïa ai hapdeng ka National Highways Authority of India (NHAI) lane ki jingthoh ba la ai sha ki kontraktor, hynrei kaei kaba donkam ka long lano yn sdang ïa ka jingmaramot ïa ka surokbah National Highway-6 bad haduh lano kan shimpor ban pyndep ïa ka kam khnang ban lah ki kali ban ïaid.
Ïa kane, ka High Court ka la pynpaw haba bishar ïa ka mukotduma ba la ai da u Bah Kynjaimon Amse pyrshah ïa ka NHAI bad kiwei ha kaba ïadei bad ka jingsniew palat ka surokbah NH-6.
Na ka liang ka NHAI ka la ai da ka jingthoh sha ka ïingbishar ha kaba la pyntip ba u Regional Officer ka NHAI na Guwahati u la leit peit hi ïa ka jinglong jingman jong katei ka surok ha ka 16 tarik Nailur, 2023.
Ha ka 19 tarik Nailur, 2023, la dep ban ai jingbthah sha uwei na ki kontraktor bad sha u Project Director ka NHAI ban shim ïa ki sienjam ba kyrkieh na ka bynta ban pynlong ïa ka surok NH-6 naduh na Jowai shaduh sha Ratacherra kaba biang ban ïaid ki kali.
Ha kita ki shithi, la pynpaw ïa ka jingdonkam ban leh eiei halor ki artylli ki jaka – ha Khliehriat bad hajan ka Tunnel ha Sonapyrdi.
Ka High Court ka la ong ba donkam ban pyndep ïa ka jingmaramot ïa ki jaka bakongsan hapoh ka 15 tarik Risaw, 2023 bad ïa kiwei pat ki jingmaramot ha ka surokbah baroh kawei kaba don 57 km shwa ka 15 tarik Naiwieng, 2023. Ka la kyrmen ba kan don ka jingpyllait pisa kaba ïahap bad ka jingdonkam jong ka kam.
Ha ka taïew ban wan, u nongmudui bad ka NHAI kin hap ban ai kaiphod haduh katno la lah ban leh ïa ka jingmaramot. La bthah ruh ïa u Deputy Commissioner ka East Jaiñtia Hills ba un ai ïa ka kaiphod halor ka jingmaramot ïa ka surok ha Khliehriat bad shaduh sha Lumshnong.
Ka jingbishar halor kane ka mukotduma kan long biang ha ka 5 tarik Risaw, 2023.
