Jowai, Nailur:
Ka Khynroo Khyllood Chilliangraij ñiamtre Committee jong ka Dorbar Shnong Chilliangraij ha ka jingsakhilang ki khun ka niamtre na kiwei ki dong ki shnat ka la pynlong ïa ka jingïakynduhlang kaba kyrpang kum ka dak ban leh kmen ïa ka lyng-khuh dap 11 snem ka jingïaid lynti jong ka.
Ïa kane ka jingkynduh lang kaba kyrpang la pynlong ha Yungwalieh ha ka 25 tarik mynta u bnai ha ka jingdonlang u Bah OH Toi, President Seinraij Jowai kum u kongsan, u Bah EMH Passah Vice-President Seinraij Jowai kum u symbud kongsan, u Langdoh Raij Jowai, u Bah Arwotki Sumer, General Secretary Seinraij Jowai, ki riew rangbah, ki longkmie longkpa bad ki samla.
Ha kane ka sngi la ïoh ka jingïathuh lyngkot shaphang ka KKCNC na ka Kong Nobel Dkhar bad ki jingkren lyngkot u Bah DH Pde, Waheh Shnong Chilliangraij, u Bah Arwotki Sumer, General Secretary Seinraij Jowai katba ka Kong Dakawanha-I War ka la ai jingkren halor ka phang ‘Yatoh Jingmut’ ha ka jingïalang kaba la pynïaid da ka Kong Jukiru Shylla.
U Bah OH Toi ha ka jingkren ula ïaroh ïa ka nongïalam ka KKCNC kiba la leh ïa ka kam babha na bynta ka burom u Trekirot bad u la kyntu ïa ki khun samla ban long kiba husiar ha ka longbriew manbriew khamtam ha kum kane ka juk ka por kaba mynta kaba kat shaba phai dap satang ki jingtynjuh jong ka jingsniew kiba wan ha ki dur ki rukom bapher kiba ktah ïa ka ïing ka sem bad ka imlang sahlang.
U Bah EMH Passah u la pynsngew shibun ki buit treikam kumno ban pynïaid shakhmat ïa ka committee bad u la ong ka jingïatreilang da jingïadei jingmut ka dei ka lynti ban ïalam sha ka thong ka ban wanrah ïa ka bha ka miat hapoh ka imlang sahlang.
Ïa kane ka jingïakynduhlang la pynphuh pynphieng da ki jingrwai jingshad ba la shim bynta da ki samla ka Shnong Panaliar, KKC Seinraij Jowai bad samla ka shnong Chilliangraij.
Ka la don ruh ka jingpynkup burom kyrpang ïa u Bah Lakhon Dkhar bad ruh la sam khusnam sha ki khynnah kiba jop ha ki jingïakop bapher bapher.
