Shillong, Nailur:
Ka Hynñiewtrep National Youth Front (HNYF) ha ka Sngi Ba-ar ka la leit ban ïakynduh ïa u Chief Executive Member(CEM) ka Khasi Hills Autonomous District Council (KHADC) Bah Pynïaid Sing Syiem halor ka jingdawa ba dei ban pyndam shisyndon ban ai trading license ïa u trai jong ka karkhana saiñ rong kaba la tip kyrteng kum ka Yanna Petro Product Pvt. Ltd kaba don ha ka shnong Mawsmai Ri Bhoi District (11 mer) ha kaba katei ka kompani ka khlem don satia ïa ki kot ki sla na ka District Council.
Haba kren sha ki lad pathai khubor, u President jong ka HNYF East Khasi Hills District, u Bah Bless Dkhar u la ong ba katei ka kompani ka la ïaid lait katkum ki aiñ jong ka District Council bad u la ong ka jingwan ïakynduh jong ka seng ïa u CEM ka long ban pyrshah beit ïa katei ka kompani.
U Bah Dkhar u la ïathuh ruh ba ym tang katta ka la don ruh ka jingkren baheh na ka liang u trai jong katei ka kompani bad u la ïathuh ba haba ka seng ka la leit dalade ban kylli ïa ka Trading License na utei u briew hynrei na ka liang utei u trai jong katei ka kompani u la kren baheh.
“Hynrei haba u wan hapoh ka jylla bad ka nongbah ka jong ngi, u dei ban burom bad u dei ban ïaid katkum ki aiñ jong ka District Council ruh”, la ong u Bah Dkhar.
U Bah Dkhar u la ong ba na ka liang ka seng ka la wan ban ïakynduh ïa u CEM khnang ban pyrshah ban nym ai Trading License ïa katei ka kompani.
Na ka liang u Bah Barnabas Manih uba dei u Assistant Secretary ka HNYF Northern Region, u la ïathuh ba katei ka kompani ka la treikam kumba saw snem eiei khlem kino kino ki kot ki sla kiba biang.
U Bah Manih u la ong ba na ka liang ka seng ka kyntu ïa ka District Council ba ka dei ban peit bniah ïa kum kitei ki briew kiba ju shim kabu bad kiba shu wan ban khaïi tang ban ïohnong khlem da peit ïa ka jingjot jong ka mei mariang bad khlem da peit ïa ka jingeh jong u paidbah kiba shah ktah lyngba ka jingsma kaba wan mih napoh katei ka kompani saiñ rong.
Na ka liang u CEM u la ong ba un dang khmih bniah halor kane bad u la ai ka jingkular ruh ba ka seng kan ïatreilang bad ka KHADC halor kane ka bynta.
Shuh shuh u Bah Manih u la ïathuh ruh ba hadien ba la ïohi ba katei ka kompani kam biang ïa ki kot ki sla, na ka liang ka seng ka la leit ban khang ïa katei ka kompani. Hynrei tang hapoh shisngi lane arsngi, katei ka kompani ka la plie biang wat la na ka liang utei u trai u la ai ka jingkular ba hapoh 7 sngi un sa leit ban shim ïa ka Trading License hynrei haduh mynta utei u briew u la leh bym salia.
U Bah Manih u la ong ruh ba lada ka KHADC kam lah ban leh eiei halor kane ka bynta, na ka liang ka seng kam banse ban ïaid beit shakhmat ban leh ïa kaba donkam.
