Jowai, Nailur 28
Kum shi bynta ban wanrah biang ïa ka shong suk shong shngaiñ ha ka thaiñ, ki bor pynïaid jong ar tylli district, ka West Karbi Anglong Assam bad ka West Jaiñtia Hills District, Meghalaya ki la pynlong ïa ka jingïakynduh bad ki ar jaidbynriew ha ka shnong Lapangap.
Kane ka jingïakynduh lang ka la long ha ka Sngi Palei, kata hadien ar sngi ka jingsiat jri markylliang kaba jur hapdeng ki Pnar bad ki Karbi ha ka thaiñ Lapangap-Tahpat kiba don ha ka khappud jong ka Meghalaya-Assam.
Ki bor pynïaid district jong ka West Karbi Anglong District ha ka jingïalam jong ka DC ka Krishna Baruah bad u SP I Baruah ki la pynlong ïa ka jingïakynduh bad ki nongïalam jong ki Karbi ha Tahpat ha ka por mynstep jong ka Sngi Palei.
Hadien ka jingïathir jingmut sani, ki nongïalam Karbi ki la mynjur ban wanrah biang ïa ka shong suk shong shngaiñ bad ban ailad ïa ki Pnar ban rep ban riang bad ban ot kba kynthup lang ha ki pynthor jong ki ha ka shnong Nongjrong, tangba katei ka jingmynjur jong ki, kan trei kam lada ki Pnar ki long kiba kloi ban phut noh ïa ki symbai dieng ba la thung ha Lum Moo Pyrdet Pynthor.
Nangta hadien katei ka jingïalang, ka DC bad u SP na West Karbi Anglong District ki la wan pat sha ka jingïakynduh ba la pynlong ha ka shnong Lapangap haba la don u DC ka West Jaiñtia Hills u Bah BS Sohliya, u SP Bah C Syrti bad u Waheh Shnong ka Lapangap Bah Deimonmi Lyngdoh.
Ha katei ka jingïakynduh, ka DC West Karbi Anglong ka la ai khubor halor katei jingmynjur jong ki Karbi ryngkat bad katei ka kyndon kaba long ban phut noh ïa ka symbai dieng ba la thung da ki nong Lapangap.
Shuh shuh na liang ki bor pulit Assam ruh ki la kular ban ai jingïada ïa ki Khasi Pnar ba kin leit ot ïa u kba uba ki la rep ha Nongjrong.
Na ka liang u DC ka West Jaiñtia Hills u la mynjur ïa ka katei kyndon bad ki la rai ruh ban leit phut ïa kitei ki symbai dieng la shai ka Sngi Thohdieng.
Katba u Waheh Shnong Lapangap u Bah Deimonmi Lyngdoh u ong ba na ka liang u DC ruh u la pynpaw ba kan bha ban phut noh ïa ki dieng ban ïa kaba duh noh ïa u khaw u kba.
Une Waheh Shnong ka Lapangap un lum ïa ka jingïalang paidbah ha ka step Sngi Thohdieng ban pynsngew ha ka dorbar ïa kane ka jingdawa jong ki Karbi.
Kumba ka long mynta ki nongrep jong ka shnong Lapangap ki la sangeh ban leit rep sha lyngkha lade bad na ka liang ki Karbi ruh ki khlem wan ap shuh sha lum pynthor.
