Shillong, Nailur 28
Ka Hynñiewtrep National Liberation Council (HNLC) ha ka Sngi Palei ka la pyntip ba ka la thung ïa u Bah Teimiki Laloo kum u Vice-Chairman bathymmai ka seng hadien ka jingiehnoh kam jong u Sufiyan A Hazarika ba la ju tip ruh kum u Manbhalang Jyrwa.
Ïa kane la pyntip da u General Secretary-cum-Publicity Secretary ka HNLC, u Bah Saiñkupar Nongtraw, ha u kyrwoh ba u la phah sha ki lad pathai khubor hadien ba u Bah Manbhalang u la dep ban ai ïa ka shithi iehnoh kam sha ka seng.
“Ngi sngewkmen ban pyntip sha phi ba u Sufiyan A Hazarika ba ju ïatip ruh kum u Manbhalang Jyrwa, u la aiti ïa ka shithi iehnoh kam, ïa kaba ngi la pdiang da ka jingsngew ïatip lem para briew,” la ong u Bah Saiñkupar.
Ha ka jaka jong u Bah Manbhalang, u Bah Saiñkupar u la pyntip ba ka Central Executive Committee (CEC) ka seng ka la thung ïa u Bah Teimiki Laloo kum u Vice Chairman bathymmai na ka bynta hynriew bnai.
Haba pynpaw ba ka jingiehnoh kam jong u Bah Manbhalang kan ym don jingktah lane kheiñ troiñ noh ïa ka bor bad ki nongrim ba ïeng da ka seng, u Bah Saiñkupar u la ong, “Ki nongrim jong ki, kin ïai neh khlem jingkylla kampher ïa ka jingkylla ha ki nongïalam”.
“Ngi kyrmen ba ki paid ka Bri u Hynñiewtrep kin ïai bteng ban ñiew burom ïa u Bah Manbhalang Jyrwa kum u para briew,” u la ong.
Haba kyntu ïa ka sorkar jylla ba kan kiar na ka jingshim kabu ïa ka jingiehnoh kam u Bah Manbhalang, u Bah Saiñkupar u la ong ba ka dei ban shimkhia hakhmat eh ïa ka jingïakren ïasuk.
“Ka long kongsan ban shim ba ka jingiehnoh kam u Bah Manbhalang kam dei ban pynthut ne ktah ïa ka jingïaid ka jingïakren ïasuk. Haba jam shakhmat, u nongïalam jong ka seng ban lamkhmat sha ka miej ïakren ïasuk un long noh da u Vice Chairman ba dang shu thung thymmai,” u la ong.
