Shillong, Nailur 28
Ka Meghalaya High Court ha ka Sngi Palei ka la maham ïa ka sorkar jylla ba kan shim ïa ki sienjam pyrshah ïa ki heh bad nongtrei sorkar kiba la pynkheiñ ïa ka hukum jong ka da kaba shah ïa kawei ka jaka die sha bad jingbam (Cafe) bad kiwei pat ki dukan ba kin plie hajan ka wah Umïam.
Ïa kane, ka High Court ka la pynpaw haba shong bishar halor ka jinglong jingman ka wah Umïam bad la katto katne por, ka la dep ban ai hukum ba ym dei ban shah ïa ki jingtei bathymmai ba kin mih hajan jong kane ka wah lane ban plie ïa kito kiba dang shu dep ban shna shen.
Ka High Court ka la bthah ïa u Chief Secretary ka jylla ba un pyntip ïa ki kyrteng jong ki heh bad ki nongtrei sorkar kiba la donkti ban ai jingbit ïa kitei ki dukan ba kin plie wat haba ka ïingbishar ka la dep mana bad ai hukum ba ym pat dei ban ailad ba kin plie.
Ka jingbishar halor kane kan long biang ha ka 3 tarik Risaw, 2023.
