Shillong, Nailur 28
U MDC ka Sohra u Bah Titosstarwell Chyne u la kmen bad phuhmut phuhmat lang halor ka jingjop ka shnong Kongthong kaba la ïoh ïa ka nam ‘Best Tourism Village (Bronze)’ ha ka National Tourism Awards 2023 kaba la ai da ka tnat jngohkai pyrthei jong ka Sorkar Pdeng.
Ka kam jngohkai pyrthei ka dei kawei kaba pynlong ïa ka shnong Kongthong ba kan pawnam khamtam haba ïadei bad ka Jingrwai Ïawbei.
Une u MDC ka Sohra u la ong ba ka jingjop ka shnong Kongthong kan nang ai mynsiem ïa kiwei pat ki shnong ba kin trei shitom ban kiew ha kane ka kam jngohkai.
U Bah Titos u la ai khublei kyrpang ïa ki nongïalam shnong kiba la trei shitom bad mynta ki la ïoh ïa u soh ka jingjop lyngba kane ka khusnam kaba ka Sorkar India ka ai.
U Bah Titos u la ai khublei kyrpang ïa u Myntri ka tnat jngohkai pyrthei ka Sorkar Jylla u Bah Paul Lyngdoh uba la trei shitom bad noh jingïarap sha ka thaiñ Khatarshnong khamtam ïa ka shnong Kongthong ba kan nang kiew shuh shuh ha kane ka kam jngohkai pyrthei.
U Bah Titos u la kyntu ruh ïa kiwei pat ki shnong ban trei shitom bad ïatylli kawei ban wanrah ïa ka jingkylla ha shnong ha thaw khamtam ha ka kam jngohkai pyrthei.
U la ong ba ki don shibun kiwei ki shnong kiba don ïa ki jaka kiba itynnad bad kiba khring ïa ki nongwan jngohkai bad kum ki paidbah nongshong shnong, ki donkam ban trei shitom bad kyntiew shuh shuh ïa kane ka kam, namar ka dei ka lad ban kamai bad kyntiew ïa ka ïoh ka kot lyngba ka kam jngohkai pyrthei.
