Jowai, Nailur:
Ka Jaiñtia Hills Development Society (JHDS) ha ryngkat ka jingïatreilang bad ka KHUBLEI Germany ki la plie paidbah ïa ar tylli ki ïing baduk ba la tei kyrpang na ka bynta ki longïing baduk ha ka shnong Mihmyntdu bad Umshyngiar Khanduli.
Kine ar tylli ki ïing ki dei ba la tei ïa ka Kong Biki Biam na ka shnong Mihmyntdu bad u Bah Gerald Siangshai na ka shnong Umshyngiar Khanduli.
Ïa kine ar tylli ki ïing la shna bad pynbit pynbiang da ka Jaiñtia Hills Development Society ryngkat ka jingkyrshan na ar ngut ki nongïarap kiba na ka Ri Germany, kita u Thomas bad ka Petra Meyer.
Ïa ka ïing jong ka Kong Biki Biam la plie ha ka 25 tarik da u Gerhard Albert, President ka KHUBLEI Germany bad la kyrkhu da u Fr. Simeon Sungoh, GB member ka JHDS ha ryngkat ka jingïadonlang u Fr. Manbha Pakem, Director JHDS, ki nongtrei bad ki nongïalam ka Balang Katholik Mihmyntdu.
La aiti sha ka longïing ka Kong Biki Biam ïa kane ka ïing ha ryngkat bad kiwei de ki tiar ba donkam kiba kynthup shi set ki shuki sofa, ar tylli ki jingthiah, ki miej, ki stole, ka drawl bad kiwei de ki jingdonkam.
Ha ka 26 tarik pat la plie sa ïa ka ïing ha Umshyniar Khanduli ha kaba la aiti ïa kane ka ïing sha ka longïing u Bah Gerald Siangshai.
La plie ïa kane ka ïing da u Coordinator ka JHDS u Bah Denis Kurkalang bad la kyrkhu da u Fr Manbha Pakem Director JHDS ryngkat ka jingïadonlang u President ka KHUBLEI Germany, ki nongtrei ka JHDS bad ki nongïalam ka Seng Rangbah Katholik Namdong Parish.
Ïa ka jinglut jingsep haba tei ïa kane ka ïing la pynbit pynbiang da ka JHDS bad ka KHUBLEI Germany ryngkat ka jingkyrshan ka Seng Rangbah Katholik Namdong Parish.
U Director ka JHDS u la pynpaw ka jingsngewnguh ïa baroh kiba donkti bad kyrshan ban pynshna ïa kine ki artylli ki ïingbaduk kiba donkam jingïarap.
