Nongstoiñ, Nailur 28
U District Magistrate jong ka West Khasi Hills District u la pynjari da ka kyndon 144 CrPC ban khang pyrshah ïa ka jingthang rnga, thang khlaw bad ban khaïi rnga ha baroh kawei ka thaiñ Mawlangsu, West Khasi Hills District.
Nalor kane, la khang pyrshah ruh ïa kino-kino briew ne ki kynhun kiba ju mlien ban pynïap dusmon ïa ki dohum-dohwah da ki dawai bih, pynbthei bom bad kiwei pat ki rukom, ha ki um bad ki wah kiba don ha ki thaiñ Mawlangsu, West Khasi Hills District bad lada lap ïa kiba ïaleh pyrshah yn pynshitom katkum ki kyndon jong ka aiñ.
Ha ka kyrwoh khubor la ong ba ka jingthang pathar ïa ki khlaw ki btap ka la ktah ïa ka mariang, ki sawdong sawkun, ïa baroh ki jingthaw kiba im kiba don hapoh jong ka bad ka pynjakhlia ruh ïa ka lyer kumjuh ka jingthang rnga pathar ka dei kawei na ki daw kaba wanrah ïa ka jingjot ka mei mariang kumjuh ruh ïa ka koit ka khiah jong ki briew.
Shuh shuh ha ka kyrwoh khubor la ong ba la ïoh jingtip ruh ba ki don ki briew ha ka thaiñ Mawlangsu kiba ju mlien ban leit tong dohum-dohwah kiba pyndonkam da ki dawai bih, pynbthei bom bad kiwei-kiwei ki rukom ban pynïap ïa ki dohum-dohwah tang na ka bynta ka jingkwah rhah bad ka myntoi shimet jong ki bad lada ym lah ban tehlakam halor kane, kan poi ka por ba ki dohum-dohwah bad kiwei pat ki jingthaw kiba im hapoh um kin duhjait syndon.
Kumta u DC ha ka kyrwoh khubor u la ong ba kane ka hukum kan treikam noh mardor bad kan neh beit kumne, hynrei lada don ki bym sngew ïahap halor kane ka hukum ki lah ban wan ïakynduh ïa u District Magistrate, West Khasi Hills District, Nongstoiñ.
