Jowai, Nailur 28
Ka shlem treikam jong ka Block Mission Coordinator, SSA-SEMAM, Laskeiñ West Jaiñtia Hills kum shi bynta ban rakhe ïa ka sngi kyrpang jong ka thoh ka pule halor ka mat pdeng mynta u snem ‘Promoting Literacy for a world in transition: Building the foundation for sustainable and peaceful societies’ ka la pynlong ïa ka Enrolment Drive Programme ha ka 27 tarik Nailur ha shnong Thadmuthlongpyrdi, Phramer CRC Laskeiñ Block.
Ha ka jingïalang ba la pynïaid da u Bah Silas Siangshai, CRP Laskeiñ Block la ïoh ka jingkren maitphang ha ka jingïadei bad ka pule puthi na ka Kong Dawansuk Lynthong, BMC, SSA-SEMAM, Laskeiñ Block bad ka khot ka wer ruh ïa ki nongshong shnong ka thaiñ Laskeiñ ba kin ïatreilang ha ka ban kyntiew ïa ka pule puthi jong ka dong ka thaiñ bad kyrpad ruh ïa ki longkmie longkpa ba kin shim ka jingkitkhlieh ban ym ailad ba ki khun ki kti jong ki kin pep skul ne long kita ki khynnah ki bym ïoh ïa ka hok ban leit skul.
Kum ka jingsngewnguh sngewburom ïa baroh ki Volunteer jong ki Special Training Centre ba don ha Laskeiñ Block, ka ophis treikam jong ka Block Mission Coordinator, SSA Laskeiñ ryngkat ka jingïatreilang bad ka ophis treikam jong ka DMC-SSA SEMAM, West Jaintia Hills, nalor ka jingpynrung skul ïa ki khynnah, ki la shim ruh ban pynkyrpang ïa kane ka ka jingrakhe mynta u snem da kaba pynkup burom ïa ki Education Volunteer kaba long ka dak ban pyni sha ka pyrthei ba dei ma ki, kita ki briew kiba trei jar jar ban kyntiew ïa ka ka pule puthi hapoh ka District khamtam ban ai jinghikai bad saiñdur ïa ka pyrkhat pyrdaiñ kito ki khynnah ba don hapdeng ka jingkutlad bad duh jingkyrmen ha kaban ïoh ïa ka jingnang jingstad.
Ka Dr. Marki Biam, JRDO Laskeiñ Block haba ai jingkren kum ka kongsan, ka la ong khlem ka jingnang jingstad ban im ha kane ka juk mynta ka long lehnohei, kumta ka khot ka wer ïa ki khynnah ba kim dei ban pep skul shiteng por, trei minot ban poi sha ka thong haduh ban da ïoh ïa ka jingnang jingstad.
Haba kut jong ka Enrolment Drive shwa ban ïoh ki kyntien khublei na ka Kong Oriency Langstang, BRP Laskeiñ Block la ïoh ruh ka jingsam ïa ki khusnam ha kaba ki nongjop jong ka Drawing-Painting ki long ka Evamgelin Suchiang, Muthlong Pioneer LPS, ka Emi Tang, Phylliewlang LPS bad u Stevenson Kanai, Muthlongrim Govt. LPS katba ha ka Slogan Competition pat ki nongjop ki long ka St. Vincent De Paul LPS, Muthlongrim Govt. LPS bad ka Muthlong Pioneer LPS.
