Nongstoiñ, Nailur 29
Ka kynhun ki samla na sor Nongstoiñ ha ka Sngi Thohdieng ki la leit ban tur sha ka shlem treikam jong u Deputy Commissioner ka West Khasi Hills halor ka jingbym pynkynriah jong u (DC) ïa ka tarik ba la hukum ban pynkhuid ïa ka Wah Nonbah bad Ïew Nongstoiñ ha ka Sngi U Blei – ka 1 tarik Risaw.
Ha katei ka sngi, katei ka kynhun ki samla na ka sor Nongstoiñ ka la rah ruh ïa ki ‘placard’ ha ryngkat ki jingpyrta ban pyndam ïa katei ka hukum.
Shuh shuh ha katei ka jingleit tur bad rah ‘placard’ jong katei ka kynhun ki samla hadien ka jingïa pyrta pynrem jong ki ïa katei ka hukum, na ka liang u DC u la khot ïakren bad ha ka jingïakren na ka liang jong u, u la pynshai halor katei ka hukum kaba u la pynmih kaba la ktah bad pynsngew mong ïa kiba bun ki kynhun Seng hapoh ka distrik.
Haba kren sha ki lad pathai khubor, u Bah D. Sun uwei na ki samla rangbah na ka sor Nongstoiñ hadien ka jingïakynduh bad u DC u la ong ba na ka liang jong u DC u la pynshai sha ki ba um lah ban ai hukum thymmai ban pynkynriah ïa katei ka prokram hynrei u la ong pat ba kam don kano-kano ka jingpynbor bad kan ym don ruh kano-kano ka jingpynshitom ïa ki bym treh ban wan ïashim bynta ha katei ka sngi.
