Jowai, Nailur 29
Ki paid nongshong Shn-ong ka Lapangap ki la ïeng pyrshah ïa ka rai jong ki bor distrik ka West Jaiñtia Hills ban phut noh ïa ki tynrai dieng na lum Pynthor kumba la dawa da ki paid Karbi.
Ïa kane ka rai ka Dorbar Shnong Lapangap ka la shim ha ka jingïalang Dorbar kaba la long ha ka step Sngi Thohdieng.
Hadien ka jingïalang Dorbar, haba ïakren bad u Waheh Shnong ka Lapangap, u Bah Deimonmi Lyngdoh u la ong ba ka Dorbar Shnong ka la rai ban pyrshah ïa ki bor synshar distrik ban leit phut ïa ki tynrai dieng namarba ka lum Pynthor ka dang hap hapoh u pud u sam jong ka Lapangap.
Lah ban kdew ba ki bor distrik ka West Jaiñtia Hills bad West Karbi Anglong distrik ha ka Sngi Palei ki la ïakynduh lang ha Lapangap. Ha katei ka jingïakynduh ka DC West Karbi Anglong ka la ai khubor halor jingmynjur jong ki Karbi ryngkat bad ka kyndon kaba long ban phut noh ïa ka tynrai dieng ba la thung da ki nong Lapangap.
U DC jong ka West Jaiñtia u la mynjur ïa katei ka kyndon bad ki la rai ruh ban leit phut ïa kitei ki symbai dieng ha ka Sngi Thohdieng. Ha kajuh ka por, u la hukum ïa ka ophis Basin ba kan phut noh ïa baroh 70 hajar ki tynrai dieng ba ai da ka MegLIFE Project (JICA) ïa kiba la thung da ki nongshong Shnong ka Lapangap.
Kumta ki bor pynïaid distrik ka West Jaiñtia Hills bad ka West Karbi Anglong mynta hi ka sngi ki la hiar sha Lum Moo Pyrdet Pynthor ha Lapangap bad ki la pynpra noh ïa ki jingker kper ba la shna kyrpang na bynta ki dieng ba la thung lyngba ka skhim na Meghalaya Basin Development Authority.
Ka jingthmu jong kitei ar tylli bor pynïaid distrik ban hiar sha Lapangap ka long ban phut ïa ki tynrai dieng ba la thung da ki nongshong Shnong ka Lapangap kumba la dawa da ki Karbi.
Hynrei ynda ki la poi ha katei ka jaka ki la lap ba bun na ki tynrai dieng ba la dep phut da ki Karbi ha u bnai Naitung bad Nailar mynta u snem bad kumta ki la shu pynpra noh ïa ka jingker.
