Mawkyrwat, Nailur 29
Kawei ka jingjia ba sngewsih kaba la jia ha ka shnong Mawten ha kaba uwei u khynnah skul uba tip kyrteng u Aiborlang Marweiñ (16 snem ka rta) u la khlad noh ha shen hadien ba u la shah pom pyrthat katba u dang rieh slap ha uwei u dieng ha kawei ka jaka kaba ki khot ka Rampharbah, Mawten, South West Khasi Hills District.
Katkum ki tyllong ba la ïoh lum na ki pulit, la ïathuh ba une u khynnah skul u dei na ka shnong Wahsiej kaba jngai kumba 7 km eiei na Mawkyrwat bad uba dang pule klas X ha Mawten Secondary School.
Shuh shuh ki tyllong khubor ki la ïathuh ba kane ka jingjia ka la jia ha ka por kumba 1:00 baje eiei noh phai sngi ha ka por ba jur bha u slap ha kaba une u khynnah u la leit ban rieh slap ha trai jong uwei u dieng kseh hadien ba u la wan thoh ïa ka ‘Pre- Selection Examination’, hynrei kyndit-kynsan u la shah pom ha u pyrthat bad u la khlad ha shen.
Ha kaba ïadei bad kane ka jingjia, na ka liang ki pulit ka Mawkyrwat Police Station ki la pynngat mukotduma ïa kane ka jingjia bad hadien ka jingkyrpad ki bahaïing ban pyllait ïa ka ‘Post Mortem’.
Na ka liang u District Magistrate u la ai bor ban pyllait bad ïa ka metïap jong une u khynnah la aitj noh sha ki bahaïing hasem ba kin pyndep ïa ka niam ka rukom.
