Shillong, Nailur 29
Ki dkhot jong ka Hynñiewtrep Integrated Territorial Organization (HITO) hapoh ka jingïalam jong u President, u Bah Donbok Dkhar, ha ka nohphai sngi jong ka 29 tarik u Nailur, 2023 ki la leit ban pdiang burom ïa arngut ki dkhot ka seng kiba la shah kem na ka jingmih ka huri-hura bad ki pulit ha ka 4 tarik u Nailur, 2023 ha surokbah pyrshah ka State Bank of India (SBI) Main Branch kaba don ha Khyndailad.
Kitei ki arngut ki dkhot ka seng kiba la lait ha katei ka sngi ki dei napdeng ki 10 ngut kiba la shah kem ha katei ka jingmih huri-hura bad ki pulit bad kitei ki arngut ki kynthup ïa u samla Faststar Umbah bad u samla Wailad Suting.
Haba ai jingkren sha ki lad pathai khubor, u Bah Donbok u la ïathuh ba baroh ki dkhot kiba la shah kem ki don 10 ngut ha kaba uwei u la lait noh ha ka 6 tarik u Nailur, 2023 namar ki jingshitom, 6 ngut ki la lait jamin ha ka 26 tarik u Nailur 2023, uwei ha ka 27 tarik u Nailur 2023 bad 2 ngut ha katei ka sngi ka 29 tarik u Nailur, 2023.
“Kam don ka jongno-jongno bad lada ba ngi thoh MLP ki lah ban kam hynrei ngi la thoh HITO da kaba shai”, la ong u Bah Donbok.
U Bah Donbok u la ong ba ka jingphong uniform jong ka seng kan bteng namar ba kam don kano kano ka jingpynkheiñ aiñ bad u la ong ba ka seng kan ïakhun beit wat la da ka sorkar ka thmu ban pyntroiñ ïa ka seng.
Shuh shuh ha kaba ïadei bad ka jingkawang lyer pynsat khmat jong ki pulit, na ka liang u Bah Donbok u la ong ba ka jingpyndonkam jong ki pulit da ki ‘stunt grenade’ ka long kaei-kaei kaba i kamkai bad ka bym lah ban pdiang satia namar ïa u ‘stunt grenade’ sha kiwei kiwei ki ri la pyndonkam bha tang ha ka por ba ïakhun bad ïa ki lehnoh.
“Ki hap ban leit shah pyntbit bad ki hap ban shah hikai shuh shuh da kano ka lynti lah ban tem namar ka jingkawang ïa u stunt grenade ngim lah ban pdiang”, la ong u Bah Dkhar.
U Bah Dkhar u la ong ba ki pulit ha katei ka sngi ba don ka huri-hura ki la pyndonkam bakla ïa ka bor hynrei u la ong ba ka jingleh jong ki pulit da ka bor ka la nang pynsat pynban.
