Shillong, Nailur 29
Ka Sorkar Jylla ka la mynjur ban kham pynheh ïa ka jaka ban pynsah ïa kiba sah ha Them Metor ynda la kynriah sha kawei pat ka jaka.
Ka Sorkar ka la ïathuh ïa kane hakhmat ka Ïingbishar (Meghalaya High Court) ha ka por ba shim bishar ïa ki mukotduma kiba la mudui da ka Sorkar Jylla bad ka Harijan Panchayat Committee (HPC).
Ïa kane ka kam la shim bishar da u Chief Justice u Sanjib Banerjee bad Justice B. Bhattacharjee kiba la pynpaw ka jingsngewkhia halor ka jingshimpor bad bym lah kloi ban pynbeit ïa kane ka kam bad pynmih ïa ka hukum haba ïadei bad kane.
Kum ban pynkynmaw, ka Sorkar Jylla kham mynshwa ka la dep pyni ïa ka jingbatai bniah haba ïadei bad ka jingpynkynriah ïa ki 342 tylli ki longïing kiba sah ha Them Metor sha ka jaka kaba don ha Shillong Municipal Board.
Ka Ïingbishar ka la pyntip ruh ba kito kiba sah ha Them Metor ki la leit ruh sha ka Sorkar Pdeng ban pynsngew ïa kane ka jingpynkynriah ka Sorkar Jylla bad ka Sorkar Pdeng ruh ka dang peit ïa kane ka kam.
Ha kawei pat ka liang, ka Ïingbishar ka la buh por ban shim bishar biang ha ka 3 tarik Risaw namarba kane ka kam ka la sahteng la bun ki por ki sngi.
