Shillong, Nailur 29
U MP ka Shillong Parliamentary konstitwensi, Bah Vincent H. Pala ha ka Sngi Thohdieng u la ban jur halor ka jingpyndonkam ïa ka ktien Khasi hapoh ïingdorbar thawaiñ ka Jylla ban kyntiew shuh-shuh ïa kane ka ktien.
Haba ai jingkren ha ka National Seminar halor ka ktien, litereshor, bad kolshor Khasi ba la pynlong da ka Khasi Authors’ Society (KAS) ha YMCA Hostel, Jai Singh Road, New Delhi, u Bah Pala u la ong, “Mynta ki por, bun kiba jop ilekshon, kim pat pyndep ïa ka eksamin matrik hynrei ngim dei ban khang lad ïa ki bad dei ban shah ïa ki ban kren da ka Khasi.”
U MP u la ïathuh ruh ba ha ka jingïalang jong ka DISHA, u ju long u nongpynïaid bad haba la ai lad ïa kito kiba don lang (MLA) ban kren Khasi, bun bah ki buit ki jingai jingmut ki la wan na ki.
Katkum ka jingsngewthuh jong u, ka KAS ka dei ban pynsngew sha ka Sorkar ban shah ïa ki nongmihkhmat ban kren da ka ktien Khasi.
U la ong ruh ba lada ki briew kim pyndonkam ïa ka ktien lajong, kumno yn pynneh-pynsah ne pynbha ïa ka.
U la ong ba ka ktien kam dei tang na bynta ban ïakren hapdeng iwei-ïa-iwei, hynrei ka kdew ruh ïa ka imlang-sahlang, lariti bad ka jingngeit.
U MP u la ong ba wat la ki Khasi ki don la ka ‘dictionary’ lajong, hynrei dang lah ban pynbha shuh-shuh da kaba ai jingmut ban wanrah ïa kane ha ka rynsan ‘online’ khnang ba kito ki pule shabar ka Jylla ne pyndonkam ktien Phareng ki lah ban ïoh bynta lang.
Na ka liang jong u, u la ong ba kum u MP, u la pyrshang rah ïa kane ka mat la bunsien ha Parliament.
U Bah Pala u la ong ruh ba ka dei ban don ka lynti khnang ba ka ktien Khasi kan ïoh jingithuh bad rung noh ha ka Khyrnit ba 8 ka Riti Synshar ka Ri.
Ha kawei ka liang, ka Myntri Sorkar, ka Dr. M. Ampareen Lyngdoh ka la ong ba ka Sorkar Meghalaya Democratic Alliance ka ïatreilang bad KAS ban ïakhun ha ka ban pynrung ïa ka Ktien Khasi ha ka Khyrnit ba 8 ka Riti Synshar ka Ri.
Ka la ban jur halor ka jingdonkam jong ka jingdon mon ha ryngkat ka jingkular ïa ka jingkyrshan jong ka Sorkar haba ïadei bad kane ka bynta.
“Ngin ym shongthait na ka liang jong ngi bad ngin pyntikna ba kane ka ajenda kan urlong ha kane ka pateng ba mynta. Ngin trei borbah ban ïohi ba kane kan poi sha ka thong,” ong ka Myntri.
Ka la pynkynmaw ruh ba ka Sorkar Jylla ha kine ki bnai ba la dep ka la ïakynduh ïa u Myntri Rangbahduh ka ri, u Narendra Modi bad aiti ruh ka dorkhas halor ki mat kiba ïadei bad ka Jylla ba kynthup ïa ka jingpynrung ïa ka Ktien Khasi bad Garo ha ka Khyrnit ba 8 ka Riti Synshar ka Ri.
Shuh shuh ka la pynsngew halor ka jingdonkam kyrkieh ban wanrah ïa ka ‘Private Members Motion’ ha Parliament la ka dei ha Lok Sabha ne Rajya Sabha.
Kum shi bynta ban dawa pynrung ïa ka Ktien Khasi ha ka Khyrnit baphra ka Riti Synshar ka Ri, ka KAS nalor kiwei-kiwei kan sa pynsngew ïa kane ka mat ha Jantar Mantar ha ka Sngi Saitjaiñ.
