Shillong, Nailur 29
Kum ka jingbteng ïa ka jingïakren ban pynbeit pud ha ka wat ka ba-ar, ki Myntri Rangbah ka Meghalaya bad Assam kin ïakynduh biang ha ka jingïalang ka ban long ha Assam ha ka sngi Saitjaiñ.
Kane ka jingïakynduh hapdeng kitei Myntri Rangbah ka dei ka sien ba-ar ha kane ka jingïakren ban pynbeit pud ha ka wat ba-ar na ka bynta ki hynriew tylli ki jaka kiba dang sahteng ban pynbeit.
Ïa ka jingïalang yn pynlong ha Assam State Guest House, Koinadhara ha Khanapara ha ka por 1 baje nohphai sngi.
Ïa kine ki Myntri Rangbah jong ki ar Jylla u Conrad K Sangma bad u Himanta Biswa Sarma yn synran lang da ki Chairman jong ki Regional Committee na baroh ar tylli ki Jylla nalor ki heh ophisar kynthup ïa ki Chief Secretary jong ki ar jylla.
Kane ka jingïakynduh u Conrad bad u Himanta mynta ka sngi ka la wan ruh ha ka por ba dang bteng ka jingïakynad ha khappud hapdeng ki Karbi bad ki paid Khasi Pnar kiba sah ha khappud ka Karbi Anglong bad West Jaiñtia Hills district ha kaba la mih ruh ka jingpyndonkam da ki tiar pynmynsaw kum ka jri bad kiwei kiwei ki tiar namar ka jingpyrkhing ïa ki jaka ban leit rep.
Ki jaka kiba hap ha ka jingpynbeit pud ha ka wat ba-ar khamtam kiba jur ka kynrum-kynram bad jingïakynad ki long ka Karbi Anglong bad West Jaiñtia Hills district.
Ha kine ki khyndiat sngi la mih ka jingïakynad kaba jur hapdeng ki Karbi bad ki paid Khasi Pnar ha Lapangap ha kaba ki Khasi kim ïoh shuh ban leit rep bad ot ïa u kba na ki pynthor jong ki.
La khmih lynti ba kine ki jingjia kin sa mih ban ïakren ha kane ka jingïakynduh hapdeng kitei Myntri Rangbah.
Ki jaka kiba ïakajia pud kiba dang sah ban pynbeit ha ka wat ba-ar ki don hynriew tylli kiba kynthup ïa ka Khanduli-Psiar, Block-I, Block-II, Langpih, Nongwah-Mawtamur, bad Deshdoomreah.
Ïa kiwei pat ki hynriew tylli ki jaka la dep pynbeit ha ka wat banyngkong ha u snem 2022.
