Shillong, Nailur 29
Ka Voice of the People Party (VPP) ha ka Sngi Thohdieng ka la pynrem jur ïa ka jingpynlong pynkhuid shnong ha ka Sngi U Blei, kata, ha ka 1 tarik Risaw da ka Sorkar India.
Ha u kyrwoh khubor, u General Secretary ka VPP, u Dr Ricky AJ Syngkon, u la ong, “Kane ka jingleh jong ka sorkar ka ktah pyrshah ïa ka jingngeit ki Khristan kiba burom ïa ka Sngi U Blei kum ka sngi ban pynlong jingmane Blei.”
Namarkata, ka VPP ka la ïawer ïa baroh ki paid riewngeit Khristan ha ka jylla ban kyntait war ïa kane ka jingkhot ban pynlong jingpynkhuid shnong bad ban nym ïashim bynta ha ka.
Ka ju long ka rukom ha ka jylla jong ngi ban pynkhuid ïa ki shnong ki thaw ha ka 2 tarik Risaw man u snem kum ka dak ka jingkynmaw burom ïa u Mahatma Gandhi, la ong u Dr Syngkon.
