Jowai, Risaw 01
Da ki hajar ngut ki paid ‘riewngeit jong ka Balang Katholik ki la wan ban sakhi ïa ka jingpynkyntang Lyngdoh Sad ïa u Rt. Rev. Ferdinand Dkhar, DD kaba la long ha Church of the Holy Spirit, Ummulong Parish, West Jaiñtia Hills District ha ka Sngi U Blei.
Ïa ka jingpynkyntang Lyngdoh Sad ïa u Bishop Ferdinand Dkhar la pyndep da u Lyngdoh Sad jong ka Jylla Niambah Shillong, u Archbishop Victor Lyngdoh, DD ha ryngkat ka jingdonlang u Archbishop, John Moolachira, DD jong ka Jylla Niambah Guwahati, u Archbishop Dominic Lumon, DD jong ka Imphal ha ryngkat ka jingsynran lang kiwei pat ki Lyngdoh Sad bad ki Lyngdoh na kiwei-kiwei ki Jylla Niam na ka Thaiñ Shatei Lam Mihngi ha ryngkat ka jingdonlang u Leopoldo Girelli, Apostolic Nuncio sha India bad Nepal.
Ha kane ka sngi la sakhi ruh ïa ki nongïalam saiñ pyrthei ki la wan shim bynta sha kane ka jingpynkyntang Lyngdoh Sad ba kynthup ïa u Myntri Rangbah ka Jylla, u Conrad K. Sangma, u MP ka Lok Sabha, u Bah Vincent H. Pala, ki Myntri Sorkar, ki MLA, MDC bad kiwei-kiwei ki kynrem ki lyndan.
Haba pharia ïa ka ktien jong U Blei, u Archbishop Victor Lyngdoh u la ong, “Ngi wan hangne ban ainguh ïa U Blei uba bha bad uba sbun, uba la ai ha ka Balang ïa u Bishop Ferdinand Dkhar ban long u nongsharai ba hakhlieh duh jong ka Jylla Niam Jowai bad ngi ai khublei kyrpang ïa u Bishop bathymmai uba la kloi ban ong hooid ïa ka mon jong U Blei lyngba u Pope Francis ban shimti ïa kane ka kam kaba khia kaba la bynshet ha u. Namarkata phi ki paid ‘riewngeit duwai na ka bynta u Bishop bathymmai jong phi.”
“U Bishop Ferdinand Dkhar u long u Lyngdoh uba jai-jai uba trei minot bad trei shitom ïa kano-kano ka kam kaba la bynshet ha u. U Blei u ïohi ïa ka dohnud jong ngi ki briew, u ïohi ruh ïa ka jinglong jong u Bishop Ferdinand Dkhar bad kumta U Blei un ai bor ha u ban trei kum u Bishop bad nongsharai ïa ka Jowai Diocese,” la ong u Archbishop Victor Lyngdoh.
U Archbishop Victor Lyngdoh u la kyntu jur ïa baroh ki paid ‘riewngeit ka Jylla Niam Jowai ban ïatreilang bad u Bishop bathymmai khnang ba kan phuh kan phieng ka Diocese bad ka imlang-sahlang.
Khyndiat shaphang u Rt. Rev. Ferdinand Dkhar, DD – la kyntang Lyngdoh Sohblei ïa u ha ka 23 tarik Kyllalyngkot, 1994. Hadien u la shah jied ban trei kum u Dean of Studies ha St Paul’s Seminary ha u snem 1994 bad 1995. Hadien la pynkynriah ïa u sha Namdong ban sharai kum u Assistant Parish Priest ha u snem 1995-2000 bad ha Parish Ummulong kum u Assistant Parish Priest ha u 2000-2002 bad ha u 2002 pat u la shimti kum u Parish Priest jong kane hi ka Parish haduh u 2007.
Ha u 2007 la pynkynriah biang ïa u sha Namdong Parish kum u Parish Priest bad kum u Principal jong ka Skul kaba u la trei haduh u 2009. Ha u 2009 u la shimti kum u ‘Procurator’ jong ka Jylla Niam Jowai haduh u snem 2021.
Hadien ba u Pope Francis u la pynkynriah noh ïa u Bishop Victor Lyngdoh kum u Bishop jong ka Jylla Niam Jowai ban shimti pat kum u Archbishop jong ka Jylla Niam Bah Shillong, ha u 2021 la thung ïa u Fr. Ferdinand kum u Diocesan Administrator jong ka Jylla Niam Jowai.
