Shillong, Risaw:
U MLA bad MDC barim jong ka Mawsynram konstitwensi uba dei u MDC ba mynta jong ka Mawkhar-Pynthorumkhrah konstitwensi Bah Pynshngaiñ N Syiem u la ong ba ka jingleit pynïasoh u Bah HM Shangpliang, MLA ba dang shu rem ha ka ilekshon na Mawsynram sha ka seng NPP kan long ka jingkyrkhu ïa u Bah Alvin Sawkmie.
U la ong ba ka jingïatreilang ki nongkyrshan u Bah HM Shangpliang bad ki nongkyrshan u Bah Alvin Sawkmie ha ka seng NPP ka la pyni ïa ka dak ba u Bah Alvin Sawkmie uba dei u MDC ba mynta un ïoh ban jop biang ha ka ilekshon MDC ka ban long ha u snem 2024.
U Bah Pynshngaiñ u la pynkynmaw ha ka por ba u mut ban leit ïakhun noh na Mawkhar-Pynthorumkhrah konstitwensi ki briew jong u baroh ki leit ban kyrshan ïa u Bah Alvin kaba pynlong haduh ba un ïoh ïa ka jingjop.
Namar kata, u don jingkyrmen ba mynta u snem u Bah Alvin un ïoh biang ïa ka jingjop namar da ka jingwan kyrshan u Bah Shangpliang.
Kum ban shu pynkynmaw, u Bah Pynshngaiñ N Syiem u la mih noh na Mawsynram konstitwensi da kaba aiti ha u Bah Alvin Sawkmie ban ïakhun ïa ka ilekshon MDC bad ïalade u la ïakhun noh na Mawkhar-Pynthorumkhrah konstitwensi da kaba ïeng na ka seng NPP bad baroh ar ngut ki la ïoh jingjop.
Haba u Bah Shangpliang u la rem noh ïa ka ilekshon MLA ha u bnai Rymphang mynta u snem u la rung noh sha ka seng NPP ryngkat ki nongkyrshan ban kyrshan noh ïa u Bah Alvin Sawkmie ha ka ilekshon MDC ka ban long la shem snem.
Da ka jingkyrshan u Bah Shangpliang ïa u Bah Alvin, ka ilekshon MDC ha Mawsynram konstitwensi kan long kaba itynnad namar ka jingïakhun kan long hapdeng u Bah Alvin uba dei u MDC ba mynta bad u kyrtong ka UDP ka ban sa pynbna kaba la don lypa ïa u MLA, Bah Olan Suiñ.
