Shillong, Risaw 01
Ka Meghalaya bad Assam ki la mynjur ban pynïaid kloi shakhmat ban nang pyndep noh ïa ka jingpynbeit pud ha ka wat ba-ar ha ki lai tylli ki jaka – Langpih, Borduar bad Deshdoomreah katba ka jingïakren sngewthuh ka dang bteng ha kiwei pat ki lai tylli ki jaka, kita ka Nongwah-Mawtamur, Block 1 & Block 2, bad Psiar-Khanduli.
Ha kajuh ka por, ka Sorkar Assam ka la rai ruh ban jynsur mynsiem haba ïadei bad ka Malangsalbari kaba hap ha Tarabari; kawei na ki jaka pynbeit pud kaba la dep ïasoi soskular ha u snem ba la dep.
“Ngi la ong ba ka Sorkar Assam kan pyni ka jingjynsur mynsiem haba ïadei bad ka jaka ha Malangsalbari ha ka por ba thew bad dro laiñ ïa u pud u sam ha kato ka jaka,” la ong u Himanta.
Ki hynriew tylli ki jaka kiba dang dei ban pynbeit pud ha ka wat ba-ar ki long ka Langpih, Borduar, Deshdoomreah, Nongwah-Mawtamur, Block 1 & Block 2, bad Psiar-Khanduli.
La ong ba ki Regional Committee jong baroh ar tylli ki Jylla ki la nang pyndep ïa ki kam ha kitei ki lai tylli ki jaka – Langpih, Borduar bad Deshdoomreah bad ym slem shuh ban pyndep noh ïa ka jingpynbeit pud.
Ki jaka kum ka Block-I & Block-II bad Psiar-Khanduli ki dei kiba kham eh ban pynbeit pud. Kine ki jaka ki don markhap hapdeng ka Karbi Anglong ha Assam bad ka Ri Bhoi District bad West Jaiñtia Hills district ha Meghalaya.
U Myntri Rangbah ka Assam u Himanta Biswa Sarma u la ong ba baroh ar tylli ki Jylla ki la rai ban pyndep noh shwa ban pynbeit pud ha ki lai tylli ki jaka, kita, ka Langpih, Borduar bad Deshdoomreah, tangba ki Regional Committee na baroh ar tylli ki Jylla kin sa phah ïa la ki jong ki kaiphod sha ki Myntri Rangbah jong ki ar tylli ki Jylla bad yn sa ïakren pynbeit bha ha ka jingïalang jong ki ar Myntri Rangbah.
Haba ïadei bad ki hynriew tylli ki jaka kiba la dep ban soi ïa ka soskular pynbeit pud ha u snem ba la dep, kine ki ar tylli ki Jylla ki la pyndep ïa ka jingpruid dak ïa u pud ha Hahim, bad kiwei ruh ki san tylli ki jaka yn sa pyndep noh ïa ka jingpruid laiñ ïa u pud u sam la kumno-kumno hapoh ka 31 tarik Nohprah, 2023.
Ha ka jingïalang jong ki ar Myntri Rangbah ka Assam bad Meghalaya kaba la long ha Assam State Guest House, Koinadhara ha Khanapara, Guwahati ha ka Sngi Saitjaiñ (30 tarik Nailur, 2023), la rai ruh ban weng noh shwa ïa ki pulit Assam bad pulit Meghalaya na ki jaka pahara jong ki ha khappud Karbi Anglong bad West Jaiñtia Hills district khamtam kum ha ka thaiñ Lapangap kum ka jingwanrah biang ka jingshaniah ha ka jaka ba don ka jingïakynad.
Ha ka jaka ki pulit Jylla, yn phah pahara shwa da ki pulit CRPF khnang ba kan nym don kano-kano jingleh shiliang bad ruh ban wanrah ïa ka jingshaniah jong ki paidbah kiba sah ha kito ki jaka khappud.
La shim ruh ïa ka rai ba ki Myntri Rangbah ka Assam bad Meghalaya kin leit jngoh ïa ka Khanduli-Psiar kawei na ki jaka ïakajia pud ha Karbi Anglong bad West Jaiñtia Hills district ha ka taïew bakhatduh jong u Risaw.
Halor ka jingshngaiñ ki nongrep khamtam kiba la dei mynta ban ot kba na ki pynthor kiba don ha khappud khamtam kum Lapangap bad ki jaka ba marjan, la shim ïa ka rai ba ki bor district lyngba ki Deputy Commissioner jong baroh ar tylli ki Jylla kin pynbeit lang ïa kano-kano ka jingeh bad lada donkam, ki nongïalam bad ki dkhot jong ki Regional Committee ruh kin sa leit ban pynbeit ïa ki jingeh.
Halor ka jingjia shahsiat ïap ha Mukroh, la rai ban pyndam noh ïa ki jingtohkit da ki nongbishar ba la thung da ka Sorkar Assam bad Meghalaya namar ki sakhi ki khlem wan mih satia na baroh arliang bad ym shym la lah ban pyndep ïa ka jingtohkit. Hynrei la rai ban aiti noh sha ka CBI ban tohkit, bad ïa ka jingujor yn nym leh ha Shillong lane Guwahati hynrei ha kano-kano ka nongbah kaba long pdeng la ka dei ha Delhi ne Kolkata khnang ba ka jingtohkit kan long ka bym shahliang bad kaba ïaid beit.
