Tura, Risaw 01
Kumba ju leh ha ki 18 snem ba la dep, ki nongsngewlem bad ki bahaïing ha sem ki lanot jong kawei ka jingjia ba sngewsih kaba la jia ha ka 30 tarik Nailur, 2005, ki la ïalum lang ha ki 2 jaka – Williamnagar bad Tura kum ka dak ban kynmaw burom ïa kito kiba la khlad noh. Ha kawei ka liang, kum shi bynta ban kynmaw burom ïa ki 9 ngut ki lanot jong katei ka jingjia, ki kynhun seng bapher-bapher ka South West Garo Hills (SWGH), ba kynthup ïa ka UGPF, FKJGP, ADE, AAYF, FAF, AAPE, CSAWO ki la khang khyrdep ïa ki dukan kum ka dak ban kynmaw burom ïa ki lanot jong katei ka jingjia. Katei ka sngi ïa kaba la tip ruh kum ka ‘Black Friday’ ka la wan jia hadien jong ki jingïakhih ba jai-jai halor ka jingïaphiah ïa ka MBOSE hapdeng ka Tura bad Shillong, kaba la ïalam sha ka huri-hura hadien ka jingshah kem jong uwei na ki nongïalam jong ka jingïakhih bad la pynbna ïa ka jingïakhih kum kaba be-aiñ.
Ka ‘headquarter’ ka MBOSE ha katei ka por ka la long ha Tura. Ki jingïakhih pyrshah ki la long ha Madan Chandmari bad ha Madan Rongrenggre, Williamnagar, East Garo Hills ha kaba da ki hajar ngut ki la ïalum.
