Shillong, Risaw 01
San ngut ki briew ki la mynsaw hadien ba ka jingbthei ka la mih na kawei ka dukan die mar-jot kaba don ha Keating Road, Shillong ha ka por kumba 1 baje eiei (mynsngi) ha ka Sngi U Blei.
Ka tdem ka la lynguh hi thui na katto-katne ki dukan ha ka mala ba shapoh na bynta katto-katne kynta katba ki pulit pynlip ding ki dang pyrshang ban wad ka lad ka lynti ban tem ïa ka ding.
Ha kaba sdang, 3 tylli ki kali pynlip ding ki la wan poi ban tem ïa ka ding bad hadien la wan poi shuh sa 3 tylli.
Ïa kitei kiba la mynsaw la tip kyrteng kum u Sam Mohammad, Billal Hussain, Kamal Uddin, Nur Mohammad Khan bad Neshan Singh bad kine mynta ki don hapdeng ka jingsumar ha Shillong Civil Hospital.
Uwei u heh pulit u la ïathuh ba katei kam shym la jia namar ka jingbthei jong ka tyndong shet jingshet naba uba don hapoh dukan um shym la lei-lei.
“Ngi shu suba ba ki nongtrei ki pyrshang ban plied ïa ki tyndong jingsynreit – kaba la ïalam sha katei ka jingjia,” u la ong.
“Ka jingbthei ka la jia namar ka kynja umphniang (kaba kem ding) na ki tyndong synreit katba ki nongtrei ki dang pynpra ïa ki tyndong bad dih duma ha ka jaka-rit kaba long kyndong,” la ong u SP ka East Khasi Hills, Bah Sylvester Nongtnger.
Na ka liang ka Crime Scene Unit (CSU), ka ‘Dog Squad’ bad ka kynhun ‘Forensic’ ki la wan poi ha katei ka jaka.
Ka ding ka la sdang na kudam jong katei ka dukan die mar-jot ba shu wai. Ïa katei ka ïing mala la long trai da H. Rapsang.
“Ïa ka Keating Road la khang namar ka jingpynkhuid ha ka Sngi U Blei hynrei ki don kumba 4 ngut eiei ki nongtrei hapoh katei ka dukan kiba dang shet jingshet. U trai dukan u la kren sha nga halor kane,” la ong u Sushil D, u trai jong kawei ka dukan ha Keating Road.
U Shekhar Nath, nongshong shnong ka Keating Road, u la ong ba ka la don ka jingsawa kaba jam ha ka por kumba 1 baje eiei mynsngi bad u la mih shabar ban peit ba la jia aïu.
Katkum ka jingïathuh u Nath, ka tdem ïong ka la neh la katto-katne por bad saphriang ruh sha katto-katne ki ïing mala ba shajrong.
Na ka liang ki pulit ki la kubur ba ha kaba sdang, ka kynhun ‘Forensic’ kam shym la lah ban rung sha katei ka dukan namar jong ka tdem.
“Bun ngut ki pulit pynlip ding ki la poi ha katei ka jaka bad ka la shim por katto-katne kynta ban tem ïa ka tdem bad ka ding kumjuh,” la ong ki pulit.
