Shillong, Risaw 01
Saw ngut ki briew ki la shah kem katba ar ngut kiwei pat ki la shah bat ha ka tnat Central Bureau of Investigation (CBI) halor ka jingshah pynïap jong ar ngut ki khynnah pule ha Manipur ha u bnai Naitung bad ba ki dur ki dar ki la paw ha rynsan ‘Social Media’ ha ka taïew ba la dep.
Ki saw ngut kiba la shah kem ki kynthup ïa ar ngut ki shynrang bad ar ngut ki kynthei nalor kiwei ar ngut ki kynthei kiba dang khynnah. Ïa kitei saw ngut la kit noh sha Guwahati, Assam katba ïa ki arngut la buh ha Imphal.
Haba pyntip ïa kane lyngba ka jingïakynduh bad ki lad pathai khubor ha ka Sngi U Blei ha Imphal, u Myntri Rangbah ka Manipur, u N Biren Singh, u la ong ba ka CBI ka la kem ïa ki saw ngut na Henglep, Churachandpur distrik ha kaba ïadei bad ka jingshah pynïap jong ar ngut ki khynnah skul, u Phijam Hemajit bad ka Hijam Linthoingambi.
Kitei saw ngut kiba la shah kem ki long u Paominlun Haokip, S Malsawn Haokip, Lhingneichong Baite bad Tinnuphing.
Hadien ba la kem ïa kitei saw ngut, la leit rah beit-beit sha ka kad liengsuiñ ha Imphal bad nangto pat la ïalam da ka liengsuiñ sha Guwahati ha ka por kumba 5:45 janmiet.
