Shillong, Risaw 01
Ka jingmang pisa ka sorkar jylla ban shna thymmai ïa ka surok na Mawmaram, East Khasi Hills haduh Mawlyndep Ri Bhoi District ka la pynkmen ïa ki paidbah hynrei haba la ïaid shakhmat ban trei ïa ka kam ka la pynsngewsih ïa ki paidbah namar ha Mawlaingut ka surok kaba la siang rong ka shong hajrong bad pynlong ïa ki paidbah ban lah tang ban khlong da ka kti.
Katkum ka durkhih (video) kaba la ring da ki ‘riew paidbah la ïohi ba ki lah ban khlong da ka kti ïa ka surok kaba dang shu dep siang mynta ka taïew ha ka thaiñ Mawlaingut kaba hap ha Sohïong konstitwensi, East Khasi Hills.
Kum ban shu pynkynmaw, ïa kane ka surok National Highway-6 la mang pisa haduh T.64.12 klur na ka bynta ka 44 km na Mawmaram ter ter sha Mawmih, Mawlyndep kaba la wan buh mawnongrim da u Symbud Myntri Rangbah ka jylla Bah Prestone Tynsong ha ka 24 tarik Jymmang, 2021 ha ka jingïadonlang u Bah Metbah Lyngdoh, MLA ka Mairang bad u Bah Samlin Malngiang kum MLA ka Sohïong ha kato ka por.
Ïa kane ka surok ka sorkar ka la phah trei ha ka M/S Tenor Engineering Sunshine Sawkmie (JV) contractor kaba la buh thong ban pyndep mynta u snem.
Haba ïakren bad u Secretary Shnong Mawlaingut, Bah Saiñdon Nongbsap u la ïathuh ba kane ka surok la trei ha ka Sngi Balang, hynrei haba ki nongleit khwai sha Dewsaw myn sngi saitjaiñ ki lap ba ka surok ka shong hajrong haba ki la pyrshang ban tan ki lap ba ka surok ba dang shu siang kam skhem.
U la ong ba kumno yn ïakren ïa ka roi ka par lada kita kontraktor kim lah ban trei bha na ka bynta ka jingmyntoi jong ki paidbah.
Nalor nangta, u la ong biang ba lada shna surok tang ban dep rukom kane ka surok kan nym shan slem namar ynda la ïaid ki trok kan phra tang katto katne bnai.
Kumta u la kyrpad ïa ka sorkar jylla ba kan bthah ïa u kontraktor ba pyntrei ïa kane ka surok ba shna bha khnang ba kan skhem kane ka surok.
Nalor kata, u la pynkynmaw haba ka sorkar ka thmu ban shna ïa kane ka surok ki paidbah ki la pynpaw ka jingkmen namar ka la sniew palat, hynrei haba la shna kam shym la ai jinghun ïa ki paidbah.
