Shillong, Risaw 01
Ka tnat khlaw jong ka Sorkar Jylla ka la pynpulom khlem lah ban pyndonkam kumba T.102.02 klur ka pisa lyngba ka Meghalaya Minor Mineral Reclamation Fund (MMMRF) kaba dei na ka bynta ban pynbha pat ïa ki par kiba la jot namar ka jingtih ïa ki mar poh khyndew kiba rit kiba heh kynthup ki par kiba la shu ieh kumto hadien ba la tih be-aiñ.
Katkum ka kaiphod jong u Comptroller and Auditor General of India (CAG) kaba dei haduh bakut jong ka 31 tarik Lber, 2022, la kdew da kaba pynshong nongrim na ki jingbatai ha bank ba la pyni da ka MMMRF bad ki jingbatai kiba la phah da u PCCF & HoFF.
La ong ba ym shym la don kano-kano ka jingpynlut haba ïadei bad ki kam ban pynbha pat ïa ka mariang.
Hynrei ym shym la pyni ne batai satia ïa ka daw balei ym shym la pyndonkam ïa ka pisa kaba don bad ka MMMRF.
Ha ka jingshisha, ka Sorkar Meghalaya ka la buh dor ban synñiang sha ka MMMRF kaba long 10 na ka 100 katkum ka dor ba la buh da ka PWD Schedule of Rates (SOR) na ka bynta u maw bad shyiap.
Shuh shuh ka kaiphod CAG ka la kdew ba ka don ka jingbym lum ïa ka pisa na ka bynta ka MMMRF kaba long T.14.51 klur bad ka jingïoh duna kaba long tang T.3.29 klur namarba ka jingbym lah treikam ka tnat ba dei khmih.
