Shillong, Risaw 02
Ka Central Reserve Police Force (CRPF) ha ka jingïatreilang bad ka tnat Women and Child Development kan pynlong ïa ka jingñiah thuk-thuk sha kylleng ka ri bad ka “Yashaswini” ka kynhun ki nongñiah thuk-thuk ban rakhe ïa ka bor ki longkmie ne ka Nari Shakti jong ka ri.
Ha ka 3 tarik u Nailur, 150 ngut ki longkmie kiba long ki ophisar ka CRPF ki ban phiah ha lai tylli ki kynhun kin mih na ka bynta kane ka jingñiah thuk-thuk sha kylleng ka ri. Da kaba ñiah ïa ki thuk-thuk 75 Royal Enfield (350cc), kine ki kynhun kin sdang ïa kane ka jingñiah thuk-thuk na ka thaiñ Shatei (Srinagar), Mihngi (Shillong) bad phang Shathie (Kanyakumari) jong ka India.
Kin ïa poi lang ha kajuh ka jaka ha u Statue of Unity ha Ekta Nagar (Kevadia), Gujarat ha ka 31 tarik u Nailur, 2023. Kane ka jingñiah thuk-thuk ka dei kumba 10000 km ka ban ïaid lyngba 15 tylli ki Jylla bad 2 tylli ki Union Territory. Ha kane ka jingïaid lynti, la pynkhreh ïa ki prokram bapher bapher ha ki distrik ba ki ïaid lyngba kiba kynthup ïa ki jingïakren bad ki briew kiba ïadei bad ka “Beti Bachao Beti Padhao” (BBBP) kum ki khynnah skul bad ki samla kynthei kiba leit kolej, ki SHG jong ki longkmie, ki cadet jong ka NCC, ki khun jong ki CCI, ki dkhot NYKS, ki samla shynrang bad kynthei, ki nongtrei anganwadi bad kiwei kiwei bad yn don ruh ka jingpynkup burom ïa ki BBBP Champion.
Ha ryngkat ka jingkyntiew ïa ka khubor “Desh Ke Hum Hain Rakshak” jong kane ka kynhun, kine ki longkmie ba ñiah thuk thuk kin wanrah ruh ïa ka khubor jong ka “Beti Bachao Beti Padhao” ha kane ka jingïaid lynti jong ki. Kin pyni ïa ka logo BBBP ha ki jaiñ bad ki banner jong ki kum ka dak jong ka jingkyrshan jong ki ïa kane.
