Shillong, Risaw 03
Lai ngut napdeng ki san ngut kiba la mynsaw ha ka jingbthei kaba la mih na kawei ka dukan die mar-jot kaba don ha Keating Road, Shillong ha ka Sngi U Blei ki dei ki nongshong shnong ka Assam.
Ïa kane, la lah ban pyntikna hadien ba ka Myntri ka tnad ka koit ka khiah ka Sorkar Jylla, ka Dr. M. Ampareen Lyng-doh ka la leit ban jngoh ïa kitei kiba la mynsaw ha Shillong Civil Hospital ha ka Lah Sngi U Blei.
Lai ngut na ki san ngut kiba la mynsaw ki dei ki nongshong shnong ba pura ka Barpetta, Assam bad kine ki la ing kumba 10% haduh 40%.
Na kitei, uwei uba la kham mynsaw, la pynkit noh sha Guwahati ha ka Sngi U Blei katba ïa ar ngut kiwei pat, la pynkit noh sha Barpetta hynne ka sngi.
Ha kawei ka liang, ki ar ngut kiwei pat kiba dang shah sumar ha Civil Hospital, Shillong ki la kham manbha bad la long ban pynkit noh ïa ki sha ka jaka sumar kaba kham biang bad sha ka shnong jong ki.
Kumban shu kdew hangne, san ngut ki briew ki la mynsaw hadien ba ka jingbthei ka la mih na kawei ka dukan die mar-jot kaba don ha Keating Road, Shillong ha ka por kumba 1 baje eiei (mynsngi) ha ka Sngi U Blei.
Ka tdem ka la lynguh hi thui na katto-katne ki dukan ha ka mala ba shapoh na bynta katto-katne kynta katba ki pulit pynlip ding ki dang pyrshang ban wad ka lad ka lynti ban tem ïa ka ding.
Ha kaba sdang, lai tylli ki kali pynlip ding ki la wan poi ban tem ïa ka ding bad hadien la wan poi shuh sa lai tylli.
Ïa kitei kiba la mynsaw la tip kyrteng kum u Sam Mohammad, Billal Hussain, Kamal Uddin, Nur Mohammad Khan bad Neshan Singh bad kine mynta ki don hapdeng ka jingsumar ha Shillong Civil Hospital.
Uwei u heh pulit u la ïathuh ba katei kam shym la jia namar ka jingbthei jong ka tyndong shet jingshet naba uba don hapoh dukan um shym la lei-lei.
U la ong ruh ba la suba ba ki nongtrei ki pyrshang ban plied ïa ki tyndong jingsynreit – kaba la ïalam sha katei ka jingjia. Na ka liang u SP ka East Khasi Hills, Bah Sylvester Nongtnger, u la ong ba ka jingbthei ka la jia namar ka kynja umphniang (kaba kem ding) na ki tyndong synreit katba ki nongtrei ki dang pynpra ïa ki tyndong bad dih duma artad ha ka jaka-rit kaba long kyndong.
Na ka liang ka Crime Scene Unit (CSU), ka ‘Dog Squad’ bad ka kynhun ‘Forensic’ ki la wan poi ha katei ka jaka. Ka ding ka la sdang na kudam jong katei ka dukan die mar-jot ba shu wai. Ïa katei ka ïingmala la long trai da H. Rapsang.
Na ka liang ki pulit ki la kubur ba ha kaba sdang, ka kynhun ‘Forensic’ kam shym la lah ban rung sha katei ka dukan namar jong ka tdem.
