Shillong, Risaw 02
Ka Myntri ka tnat ka koit ka khiah ka jylla ka Kong Ampareen Lyngdoh haba pynpaw ka jingsngewdiaw, ka la ong ba ka jingnoh synñiang ïa ka snam hapoh ka jylla Meghalaya ka long kaba duna bha naba ka poi tang 18 persen ha ka jylla baroh kawei haba ïanujor bad ka 100 persen jong ka National Average.
Ka Kong Ampareen ka la pynpaw ïa kane haba ka la ïashim bynta ha ka National Voluntary Blood Donation Day, kaba la pynlong ha Nazareth Hospital, Laitumkhrah, Shillong ha ka Lah Sngi U Blei.
Ha kane ka sngi, ka Myntri ka la kyntu ïa ki nongshong shnong ka jylla ba kin mih shakhmat ha kane ka mishon kaba kongsan ban pynthikna ba ka Ayushman Bhav bad ka Sewa Pakhwada kan ngam ha man la ki ïing bad kyndong kynshrot jong ka jylla. Ka la ong ba ka jingai ïa ka snam na ka bynta jingsumar kaba kyrkieh ka long kaba kongsan bha kum ka jingnoh synñiang sngewbha ban pynthikna ba ki nongshong shnong kin ïoh jingmyntoi shisha na ka jingïoh jingsumar kaba salonsar ïa baroh. Ka snam ba kordor kaba la noh da baroh ki ‘blood donating organization’ kiba la ïoh ïa ka jingithuh haduh ki ‘blood storage centers’ kiba la ïoh jingithuh ka long kaba kongsan bha ïa ka jylla Meghalaya.
Ka la ong ba ka imlang sahlang ka hap ban mih shakhmat bad ban ïar ka jingmut jingpyrkhat ban sdang ïa ka jingnoh synñiang tista ïa ka snam.
Ki khana bad ki jingsngewthuh bakla halor ka jingai snam ka dei ka bynta kaba la ktah bha ïa ka jingnoh synñiang ha ka jylla Meghalaya, la ong ka Myntri.
Haba kynmaw burom ïa ka lyngkhuh sngi kha u Mahatma K Gandhi, ka Kong Ampareen kala ai jingïaroh ïa ka synñiang kaba khraw jong une u nongïalam ba radbah ka ri bad ka long kaba ïahap bha ban pynlong ïa kane ka prokram ha kane ka sngi ha kylleng ka ri.
