Shillong, Risaw 02
Ka Akhil Bharatiya Vidyarthi Parishad (ABVP) lyngba u National General Secretary, u Yagywalkya Shukla ka la kyrshan ïa ka National Education Policy-2020 (NEP), da kaba kdew ïa ki bynta kiba kongsan jong katei ka mat treikam ha ka jingïakynduh bad ki lad pathai khubor ha ka Lah Sngi U Blei ha Shillong.
U Shukla u la ban jur ba katei ka mat treikam ka pynleit jingmut ïa ka pule-puthi ha ki ktien tynrai jong ka India, ha kawei ka liang ka ban long ka jingmyntoi ha ka ban pynwandur ïa ka jinglong-jingman kaba bit ba biang ha ka pule-puthi.
Ha kajuh ka por, u la buh jingkylli ba balei kan don ka jingpyrshah lada ki samla pule ki ïoh lad ban pule ha ki ktien tynrai – da kaba ban jur halor ka jinglah jong katei ka mat treikam ban wanrah jingkylla ha ka pule-puthi.
Utei u nongïalam ka ABVP u la kdew ruh ïa ka jingpynleit jingmut jong katei ka mat treikam ha ka ban pynsaphriang ïa ka pule-puthi ha ki ktien tynrai; ka sienjam kaba khmih lynti ban weng ïa ki jingeh ha ka ktien ka thylliej, ha kajuh ka por ban kyntiew shuh-shuh ïa ka jingsngewthuh jong ki sobjek hapdeng ki samla pule.
Na ka liang u Shukla u la buh jingkylli ruh, “Lada ki samla pule ki don lad ban pule ha ka ktien tynrai jong ki, kaei ka jingeh?”
Haba pynsngew ba kane ka kyndon kan pynkup bor ïa ki samla pule, u la ong ba kane kan pynlong ruh ïa ka pule-puthi ka ban kynthup lang ïa baroh.
U la kyntu ruh ïa baroh ban shim ïa ki jingsynñiang ba bha kaba ka National Education Policy-2020 ka wanrah sha ka kynhun ki samla pule.
U National General Secretary u la ban jur ba kane ka mat treikam ym tang ba ka wanrah ïa ka jinglong kylluid ha ka pule-puthi hynrei ka pynkhreh ruh ïa ki samla pule ha ka liang ki sap ki phong bad ki jingtip kiba donkam ban kiew ha kane ka pyrthei ba mynta.
Ha kawei ka liang, ka Meghalaya Unit jong ka ABVP dang shen ka la pynlong ïa ka jingïalang ba ar sngi ha Shillong kum shi bynta jong ka ‘Amrit Mahotsav’.
Palat 100 ngut ki karyakarta (dkhot) ki la ïashim bynta ha ka jingïalang pynkup burom ïa ki dkhot barim, ba kynthup ïa i Sitimon Sawian (Bam Kwai ha Dwar U Blei), iwei na ki ‘riewpawkhmat ha ka khana jong ka ABVP hapoh Meghalaya.
U Shukla u la pynbna ruh ba ha ka 5 tarik Risaw, ka ABVP kan sa rakhe ïa ka ‘Rani Durga Wati Jayanti’ ha baroh kawei ka ri ha baroh ki jaka pule. Kumjuh, ha u Naiwieng, ka ABVP kan sa rakhe ïa jingdap 75 snem ka ban neh 15 sngi lynter bad ka ban kynthup ïa 75 ngut ki dkhot ki ban wan pule bad ban sngewthuh ïa ka lariti jong ka Thaiñ Shatei Lam Mihngi.
Haba phai sha ka jinglong-jingman ha Manipur, ka ABVP ka la ong ba ka ri baroh kawei ka sngewsih kthang halor kaei kaba la jia bad kdew ba kaei-kaei kaba sha lyndet haba ïadei bad katei ka jingïakynad ka dei ban paw pyrthei.
“Ngi pynrem jur halor kiba kum kine ki jingjia bad ngin ym pdiang ïa kaei kaba jia ha Manipur. Ngi kyrpad sha baroh ki kynhun ban wanrah ïa ka suk ka saiñ bad ka shongsuk shong shngaiñ hapoh ka Jylla,” u la ong.
