Jowai, Risaw:
Ka Seng Samla Balang Katholik Mihmyntdu ryngkat ka jingïatreilang bad ka Jingïaseng Samla Balang Presbyterian Mihmyntdu bad ka Ai Jingim Foundation ha ka 30 tarik Nailur ki la pynlong ïa ka ‘Blood Donation Camp’ ha RC Eve Secondary School, Mihmyntdu.
Kum ban shu pynkynmaw, kane ka dei ka sien kaba san ba ka Seng Samla Balang Katholik Mihmyntdu ka la pynlong ïa kum kane ka prokram ha ryngkat ka jingïatreilang bad kiwei ki kynhun.
La sdang ïa kane ka prokram da ka jingïalum lang hapoh RC Hall ha kaba la don ka prokram ba lyngkot ïa kaba la pynïaid da u Ma Fredrick Synnah, Chairman Parish Pastoral Council ka Jowai Parish.
Ha kane ka prokram la don lang u Bah Octomewot Lamin, MDC JHADC, u Fr. Hilarious Lamare, Parish Priest, Jowai Parish, ka Dr. P. Shylla, Senior Medical Officer-in-charge ka Blood Bank-Jowai, u Dr. D. Shylla, District Medical Officer, East Jaiñtia Hills, u Bah Phillip P.B. Marweiñ, dkhot nongseng ka Ai Jingim Foundation, u Waheh Shnong ka Mihmyntdu, u Bah Abul Phawa, u samla Emanuel Sumer, Chairman ka Jingïaseng Samla Balang Presbyterian Mihmyntdu, ki nongïalam ka Balang Katholik Mihmyntdu bad kiwei-kiwei.
U Bah O. Lamin u la ai ka jingïaroh ïa kine artylli ki seng kiba la shim ïa kane ka sienjam ba khraw ban len ïalade na ka bynta ban ai jingim ïa kiwei. U la kyntu ruh ïa ki nongpynïaid ba ki dang donkam ruh ban kham pynïar shuh-shuh ïa ki jingpynsngewthuh halor kane ka phang khnang ba ki briew kin ym sheptieng ban ai snam.
U Bah Philip Marweiñ, u la ong ba ka snam ka dei ka jingai ei ba kyrpang jong U Blei bad kumta donkam ban ai ei ïa ki parabriew kiba donkam jingïarap.
Ha kaba kut jong ka prokram la ïoh ruh ïa ka jingsam ïa ka khusnam sha ka nongjop jong ka jingïakop dro ba la pynïaid da ka Seng Samla Balang Katholik.
