Mawkyrwat, Risaw 02
Hadien saw sngi jong ka jingshah rong noh ha ka um, ïa ka metïap jong uwei heprit la lap bad sei noh ha ka Lah Sngi U Blei ka 2 tarik mynta u bnai na ka wah Kynshi.
Kane ka jinglap ïa ka metïap jong utei u heprit ba dang 14 snem ka rta ïa uba la tip kyrteng kum u Mario Thongni Nongmor, ka la long da ka jingtrei shitom ki pulit Fire & Emergency jong ka Mawkyrwat ryngkat ki paidbah jong ki lai tylli ki shnong, kata ka shnong Nongjri, Nongtnger bad Nongmallam lem bad ka kynhun ki SRT.
Kum ban shu pynkynmaw ba kane ka jingjia ba sngewsih ka la jia ha ka nohphai sngi jong ka 29 tarik u Nailur 2023 ha ka por kumba 1:30 eiei katba u Mario Thongni Nongmor ryngkat bad u kpa jong u, u Bah Henry Nongtnger ki dang wan na Nongjri ban leit sha Nongmyllang hadien ba u khun u la ïoh shuti na skul.
Ki tyllong khubor ki la ïathuh ruh ba katba kine ar ngut shi-kpa shi-khun ki dang thmu ban jam sha shiliang ka wah ban leit noh sha la shnong sha Nongmallam bad ynda ki la poi ha kawei ka jaka kaba ki khot ka wah Siangpliang namar ka jingheh bad jingkhlaiñ jong ka wah kine baroh ar ngut ki la shah rong noh ha ka um.
Shuh shuh ka tyllong khubor ka la ïathuh ruh ba u Bah Henry Nongtnger uba dei u kpa u la ïaleh katba lah ban ïarap ïa la u khun, hynrei kaba sngewsih ka long namar ka jingkhlaiñ palat jong ka um ym shym la lah ban pyllait im ïa la u jong u khun.
