New Delhi, Risaw 02
Kumba 24 ngut ki briew, ba kynthup ïa 12 ngut ki khyllung ba dang shu kha ki la khlad noh hapoh 24 kynta ha kawei ka aspatal Sorkar haba don ha Nanded distrik jong ka Maharashtra.
Ki bor pynïaid ka Shankarrao Chavan Government Hospital ha ka Lah Sngi U Blei ki la ong ba ki jingïap ki la wan jia namar ka jingduna dawai.
U Dean jong ka aspatal u la ong ba ki 12 ngut ki khyllung kiba la khlad noh ki kynthup ïa 6 ngut ki shynrang bad 6 ngut ki kynthei.
Ha kajuh ka por, u la ong ba ki 12 ngut kiwei pat ki rangbah briew ki la khlad namar ki jingpang bapher-bapher ba kynthup ïa ka jingshah puh bseiñ.
U la batai ba ka aspatal ka dei tang ka “Tertiary-Level Care Centre” hynrei ki nongpang ki wan na ki jaka bapher-bapher.
Ka jingdon ki nongpang kiba wan sha ka aspatal teng-teng ka tam ïa ka jingmang jong ka aspatal bad namarkata ka don ka jingduna ha ka liang ki dawai, u la bynrap.
Kumjuh, u la ong ba ka la buh jingeh khamtam namarba bun ngut ki nongtrei ki la shah pynkynriah kam.
U Dean u la ong ruh ba ka aspatal ka la dei ban thied dawai na kawei ka shlem ba la tip kum ka ‘Haffkine’, hynrei kam shym la urlong. U la ong ba ki nongpang ki la ïoh dawai hadien ba la shu thied ïa ki na ki dukan die dawai.
Halor katei, u nongai-ktien ka Nationalist Congress Party (NCP), u Vikas Lawande, ha ka jingbuh jingthoh ha ‘X’, u la ong, “Ka jingïap jong ki 24 ngut, ba kynthup ïa 12 ngut ki khyllung ba dang shu kha hapoh 24 kynta ha ka aspatal Sorkar ha Nanded kam dei tang namar ka jingbym pynbiang dawai da ka Sorkar Jylla. Ka long ka jinglehraiñ ïa ka Sorkar kaba pynbna halor ki tamasa bad ki prokram.”
Ka MP ka Shiv Sena (UBT), ka Priyanka Chaturvedi ka la ther tyngeh ïa ka Sorkar hapoh ka jingïalam ka BJP bad ong, “Sngewbha wat ong ba ki dei ki jingïap, kane ka dei ka jingpynïap namar ka jingthurmur na ka liang ka Sorkar Jylla kaba long pyrshah ïa ka riti synshar.”
Ka la kynnoh ba ka Sorkar Jylla ka bunkam ha ka ban pyrkhat na bynta ban pynkhreh ïa ki prokram ne ka jingleit bar-ri bad ong ba ka klet pat ba ka kamram jong ka, ka long ban shakri ïa ka Jylla.
Ka Working President ka NCP, ka Supriya Sule ka la dawa na u Myntri Rangbah ka Maharashtra, u Eknath Shinde ban phah tohkit halor katei ka jingjia bad dawa weng ïa ki Myntri ba dei khmih na ka kam ba ki bat.
Shuh shuh ka la bynrap ba ki bahaïing hasem jong kito kiba la khlad ki dei ban ïoh ïa ka bai lutksan halor ka jingduh jong ki.
