Shillong, Risaw 02
Ka seng Hynñiewtrep National Youth Front (HNYF) East Khasi Hills bad ka Riwar Mihngi Circle ha ka 1 tarik u Risaw, 2023 ka la pynlong ïa ka jingleit talasi ïa ki trok kit masi be-aiñ kiba leit khaïi be-aiñ sha Bangladesh.
Ha katei ka jingleit talasi, ka seng ka la ïoh ban bat ïa shibun tylli ki trok kiba kit masi be-aiñ kiba dang thmu ban leit khaïi be-aiñ sha Bangla. Kumta na ka liang ka seng ka la leit ban ujor da ka FIR ïa kitei ki trok kiba la leh be-aiñ.
Ka seng ka la buh jingkylli ba kumno da ki spah tylli ki masi kin leit hiar sha Bangla lada ym dei ba ki thmu ban leit shalan tuh, bad ka seng ka la ong ba dei na kane ka daw ba kan sa kiew dor ka dor jong ka doh masi.
Na ka liang ka seng ka la maham tyngeh eh ruh ba lada jia biang kumne nangne shakhmat, ka seng kan sa shim pat da kiwei ki sienjam.
