Shillong, Risaw 02
U jumai uba don 5.2 ha u Richter Scale u la khie ha ka janmiet jong ka Lah Sngi U Blei ha North Garo Hills, Meghalaya, bad une u juh u jumai u la ktah lang ïa ki jaka ba marjan ba kynthup ïa ka Assam.
Katkum ka jingpynbna na ka National Centre for Seismology (NCS) jong ka Sorkar India, la ong ba une u jumai u la khie ha ka por 6:15 janmiet ha North Garo Hills.
Ha kajuh ka por, haba pynbna ha ka rynsan ‘X’, katei ka shlem treikam ba khmih ïa ka jingkhie jong u jumai, ka la ong ba sa uwei pat u jumai uba kham rit (Aftershock) uba lah ban don hapdeng 4.0 bad 4.2 ha u Richter Scale u lah ban khie biang ha North Garo Hills hapoh 24 kynta.
Haduh ba thoh ïa kane ka khubor, ym pat ïoh jingtip la ka la don ne em ka jingmynsaw jong ki briew ne ka jingduh jong ki jingdon jingem namar ka jingwan jong utei u jumai mynta ka janmiet.
