Shillong, Risaw:
Ka Rimika Dkhar kaba dei ka puron kaba dang khie samla kaba la ak nyngkong ha ka phlim ‘Johkhe.com’ ka don jingthrang ban pyndep beit ïa ka Bachelor of Science (BSC) ha ka first semester kaba dang pule mynta ha Kiang Nangbah College.
Ka Rimika ka dei kaba dang don 19 snem ka rta na ka shnong Molamanoh kaba hap ha East Jaiñtia Hills District. Kane ka samla ka don jingthrang ban bteng ïa ka kam ak phlim ryngkat ban pyndep ïa ka jingpule.
Ïa ka sap ban ak phlim ki paidbah kin sakhi ïa kane ka puron ha ka phlim ‘Johkhe.com’ ka ban sa pyni paidbah ha Bijou Cinema, Shillong naduh ka 6 tarik Risaw, 2023.
Kane ka puron ka la ïoh ban ak nyngkong ïa ka music video jong kane ka phlim kaba ai kyrteng ‘Activate’ kaba la pyllait ha ka 3 tarik Nailur, 2022.
Ka la ïathuh ba ha ka por ba pynbna ban leh da ka audition ïa ka phlim ‘Johkhe.com’ kam shym la poi pyrkhat ba kan shah jied namar ka leit da ka jaiñ ïing, hynrei ka sngewkmen ba ka la shah jied namar kane ka dep ka sap kaba la kwah naduh dangrit.
Nalor kane, ka la ïathuh ruh ha ka por ba dang ringdur ïa ka phlim ‘Johkhe.com’ ka dang pule class-XII (science) hynrei ka la wan ba nyngkong namar ka kham leh bha ruh ïa ka sobjek Khasi.
“Lada ngan pyndep ïa ka B.Sc ngan nym wad kam sorkar namar ka eh palat ha kane ka juh, ngan sdang da ka kam lajong bad ak phlim artad” ka la ong.
Ka la pyntip ba wat la ka dang pule science hynrei da ka lait por ka wan leh model ha Shillong namar ka thrang ruh ban ioh ban bteng ban ak phlim lada don ki nongpynmih phlim kin khot ïa ka.
Kumta ka la kyrpad ïa ki paidbah kiba ieid phlim ba kin wan ban ai jingkyrshan ïa ka ynda la mih ka phlim Johkhe kaban sa pyni naduh ka 6 tarik Risaw 2023 ha Bijou cinema.
